2026-cı il üzrə pensiyanın orta aylıq məbləği AÇIQLANDI
Qanunvericiliyə əsasən, Azərbaycanda hər il olduğu kimi, 2026-cı ildə də əmək pensiyalarının indeksləşdirilməsi və artırılması nəzərdə tutulur. Bu mexanizm orta aylıq əməkhaqqının illik artım tempinə uyğun şəkildə həyata keçirildiyindən, növbəti ilin yanvarından bütün növ əmək pensiyalarında artımın baş verəcəyi proqnozlaşdırılır. Bu proses həm sosial müdafiə sisteminin davamlılığını, həm də pensiyaçıların gəlirlərinin inflyasiya fonunda qorunmasını təmin edən əsas alətlərdən biri hesab olunur.
Mövzu ilə bağlı iqtisadçı, professor Rəsmiyyə Sabir Crossmedia.az-a açıqlama verib: "Ölkəmizdə əmək pensiyaları əvvəlki ilin orta aylıq əməkhaqqının artımına uyğun olaraq indeksləşdirilir. Təbii ki, 2026-cı il üçün də Azərbaycanda orta aylıq nominal əməkhaqqının artımına uyğun şəkildə pensiyalar indeksasiya olunacaqdır və bu indeksasiya avtomatik şəkildə həyata keçiriləcəkdir".
Ekspert bildirib ki, 2026-cı il üçün indeksasiya proqnozu təxminən 9,2%-dir: "Bu sahə üzrə dövlət rəsmilərinin məlumatlarına əsasən 2026-cı ildə indeksasiya xərcləri üçün 635,6 milyon manat vəsait nəzərdə tutulmuşdur. 2026-cı ildə pensiyanın orta aylıq məbləğinin 590 manata, yaşa görə pensiyanın orta aylıq məbləğinin isə 629 manata çatdırılacağı proqnozlaşdırılır".
Ayhan
18:40 20.11.2025
Oxunuş sayı: 2797
