Hafiz Paşayev: Beyin Mərkəzləri forumları Azərbaycan və ABŞ münasibətlərinin inkişafı üçün stimul olacaq
Beyin Mərkəzləri forumları Azərbaycan və ABŞ münasibətlərinin inkişafı üçün stimul olacaq.
Crossmedia.az-ın məlumatına görə, bunu ADA Universitetinin rektoru Hafiz Paşayev Bakıda keçirilən Azərbaycan-ABŞ Beyin Mərkəzlərinin Birinci Forumunda bildirib.
"ABŞ-dəki diplomatik mandatım dövründə bu ölkədə beyin mərkəzlərinin nə qədər fəal və peşəkar işlədiyi məni təəccübləndirib. Mən kifayət qədər çətin dövrdə ABŞ-də Azərbaycanın səfiri olmuşam və Vaşinqtonda ölkəmizin ilk nümayəndəsi idim. Mənim üçün bir çox şey yeni idi və bu prosesdə beyin mərkəzləri böyük rol oynadı. Onların arasında xüsusilə CSIS-i qeyd edərdim. Tez-tez onların tədbirlərində iştirak edirdim və bu, mənim üçün həqiqi diplomatiya məktəbinə çevrildi", - o bildirib.
H.Paşayev, həmçinin ilk Azərbaycan-ABŞ Beyin Mərkəzləri Forumunun həyata keçirilməsi ideyasını yüksək qiymətləndirib və qeyd edib ki, bu cür forumlar ikitərəfli münasibətlərin inkişafı üçün stimul olacaq.
Xatırladaq ki, Hafiz Paşayev müstəqil Azərbaycanın ABŞ-dəki ilk səfiri olub. O, 1993-cü ildə bu vəzifəyə təyin edilib və sonrakı illərdə Azərbaycan-ABŞ münasibətlərinin formalaşmasında rolları olub. (Report)
09:45 18.11.2025
Oxunuş sayı: 1798
