Müxalifət nümayəndəsi: Prezident hər dəfə haqlı olaraq onları tənqid edir
Korrupsiya və vəzifə səlahiyyətlərindən sui-istifadə hallarına qarşı ölkədə davamlı əməliyyatlar aparılır. Buna baxmayaraq, bəzi məmurlar hələ də öz mənfəətlərini dövlətin və xalqın maraqlarından üstün tutmaqda israrlıdırlar.
Prezident İlham Əliyev bu günlərdə Naxçıvanda Prezidentin yeni səlahiyyətli nümayəndəsini və bir sıra rayonların icra hakimiyyətlərinə təyin olunan başçıları qəbul edərkən də bu barədə danışıb.
O bildirib ki, bəzi məmurlar göstərişləri yerinə yetirmək əvəzinə, ancaq öz ciblərini güdərək qanunsuz varlanmaya üstünlük verirlər.
ReAl partiyasının sədri Natiq Cəfərli məsələ ilə bağlı Crossmedia.az-a açıqlama verib:
“Məmurların rüşvətxorluqla məşğul olması və bu halların xüsusən regionlarda baş verməsi bir neçə məsələni üzə çıxarır. Prezident hər dəfə haqlı olaraq onları tənqid edir. O zaman rayonlardakı prokurorluq və hüquq mühafizə orqanları niyə zəiflik göstərir? Onlar da ciddi şəkildə öz funksiyalarını yerinə yetirməlidir. Ən əsası isə vətəndaş cəmiyyəti formalaşmalıdır. Vətəndaşların dövlət orqanlarına nəzarət mexanizmi olsa yaxşı olar”.
Ayhan
12:06 14.11.2025
Oxunuş sayı: 2049
