Rusiya tərəfindən edilən üzrxahlıq diplomatik etimadın göstəricisidir - Deputat
Rusiya tərəfindən Azərbaycan hava yollarına məxsus təyyarənin vurulması ilə bağlı insident və bu hadisəyə görə edilən rəsmi üzrxahlıq regiondakı diplomatik münasibətlər baxımından diqqətəlayiq hadisədir. Beynəlxalq münasibətlərdə üzr diləmək dövlətlərarası gərginliyin azaldılması və qarşılıqlı etimadın bərpası üçün mühüm əhəmiyyət daşıyır. Bu addım, həmçinin, Azərbaycanın beynəlxalq hüquq və suverenlik prinsiplərinə hörmətin ifadəsi kimi qiymətləndirilir. Rusiya tərəfinin etirafı münasibətlərin strateji xarakterini qorumaq niyyətini göstərir. Hadisə həm diplomatik, həm də psixoloji aspektdən iki ölkə arasında anlayış mühitinin formalaşmasına şərait yaradıb.
Bu barədə deputat Aydın Hüseynov Crossmedia.az-a açıqlama verib ki, Rusiya tərəfindən Azərbaycan hava yollarına məxsus təyyarənin vurulması ilə bağlı insidentin etiraf edilməsi və rəsmi üzrxahlıq göstərilməsi diplomatik münasibətlər baxımından olduqca mühüm addım kimi qiymətləndirilə bilər: "Beynəlxalq münasibətlərdə etiraf və üzr diləmək təkcə formal jest deyil, həm də dövlətlər arasında etimadın bərpası və gərginliyin azaldılması üçün əhəmiyyətli siyasi siqnaldır. Diplomatik baxımdan bu addım Azərbaycanın beynəlxalq hüquqa və qarşılıqlı hörmət prinsiplərinə əsaslanan siyasətinə hörmətin ifadəsidir.
Rusiya tərəfi etirafla həm də göstərmiş oldu ki, Azərbaycanla münasibətlərin strateji xarakteri onun üçün prioritetdir. Üzr həm gərginliyin yumşalmasına, həm də iki dövlət arasında praktiki əməkdaşlığın davam etdirilməsinə imkan yaratdı".
Deputat qeyd edib ki, psixoloji baxımdan isə bu hadisə Azərbaycan ictimai rəyində müəyyən mənada emosional gərginliyi azaltdı: "Hadisə ilk anlarda haqlı olaraq narazılıq doğurmuşdu, lakin Rusiya tərəfindən atılan bu addım bir növ etiraf və məsuliyyətin qəbul edilməsi kimi dəyərləndirildi. Diplomatiyada üzr təkcə söz deyil, eyni zamanda psixoloji təsir vasitəsidir — qarşı tərəfə hörmət göstərmək, onun suverenliyini və haqqını tanımaq anlamı daşıyır. Uzunmüddətli perspektivdə bu hadisənin etirafı və üzrxahlıq Azərbaycan-Rusiya münasibətlərində etimad mühitinin möhkəmlənməsi üçün mühüm rol oynaya bilər, bu regionda sabitlik və qarşılıqlı balanslı siyasət üçün də müsbət nəticələr doğuracaq. Beləliklə, Rusiya tərəfindən edilən üzr həm diplomatik mədəniyyət nümunəsi, həm də münasibətlərin gərginlik mərhələsindən dialoq mərhələsinə keçməsi baxımından əhəmiyyətlidir. Bu hadisə göstərdi ki, böyük güclər belə, regional reallıqları və Azərbaycanın artan siyasi çəkisini nəzərə almağa məcburdur".
Türkan Kərimli
12:25 08.11.2025
Oxunuş sayı: 1600
