Azərbaycan- Çin münasibətlərində yeni yol, yeni cığır açılıb- ŞƏRH
Azərbaycan Prezidenti İlham Əliyev Çin Xalq Respublikasının Sədri Si Cinpinə milli bayram münasibətilə təbrik edib. Təbrik məktubunda dövlət başçısı qeyd edib ki, son dövrdə Azərbaycan-Çin münasibətləri yeni mərhələyə qədəm qoyub:
"Aramızdakı fəal dialoq, səmimiyyət və qarşılıqlı etimad şəraitində keçən görüşlərimiz, təmaslarımızın intensivliyi Azərbaycan-Çin əlaqələrinin səviyyəsindən və yüksək dinamikasından xəbər verir. Aprel ayında Çinə dövlət səfərim zamanı imzalanmış sənədlər, xüsusilə də "Azərbaycan Respublikası ilə Çin Xalq Respublikası arasında hərtərəfli strateji tərəfdaşlıq əlaqələrinin qurulması haqqında Birgə Bəyanat" ikitərəfli əlaqələrimizi daha da yüksək pilləyə qaldırmış, dövlətlərarası münasibətlərimizin strateji mahiyyətini gücləndirmişdir".
Bakı - Pekin əlaqələrinin perspektivi barədə Crossmedia.az-a danışan Milli Məclisin deputatı Azər Badamov əldə etdiyimiz Zəfərdən sonra cənab Prezident İlham Əliyevin yeritdiyi daxili və xarici siyasətin ümumən tamamilə başqa bir xarakter, fərqli bir rəng aldığını qeyd edib: "Təkcə dövlət başçımızın iş qrafikinə, keçirdiyi görüşlərə nəzər yetirmək kifayətdir ki, səfərbər edilən gücün xalqımızın rifahı istiqamətində qoyulduğunun şahidi olasan. Müşahidə olunan ən başlıca məsələ odur ki, biz millət və xalq olaraq artıq tam təşkilatlana bilmişik, dövlət və xalq kimi isə bir hədəfə vurmağı bacarırıq. Bəlkə də illər ərzində dünyada haqqımızda yaradılan mənfi imicin də məqsədi bu idi. Xalqımızı parçalamaq, dövlətlə xalq arasında uçurum yaratmaq. 27 sentyabr tarixindən başlayan yol isə tamamilə fərqli reallığı üzə çıxardı. Bu məhz o reallıq idi ki, heç bir kənar qüvvəni haqq savaşımıza müdaxilə etməyə icazə vermədik. Paralel olaraq da xarici siyasətimizdə hərtərəfli inkişaf kursu həyata keçirməyə başladıq. Etiraf etmək lazımdır ki, dəyişən dünya reallıqlarında oturuşmuş, stabil aktorlarla münasibətlərin dərinləşdirilməsi hər bir aktorun can atdığı məsələdir. Lakin burada qarşılıqlı istək və maraq olmalıdır".
Parlamentarinin sözlərinə görə, Azərbaycan bu marağı ölkələrdə yaratmağı bacarıb: "Buna nail olmağımızın kökündə dayanan amil dövlətimizin etibarlı tərəfdaş imici, Azərbaycan Liderinin bütöv şəxsiyyət obrazıdır. Çin Xalq Respublikası qeyd edilən məhz həmin vacib, qlobal güclərdən biridir. Siyasət səhnəsində olduğu qədər qüdrəti həm də iqtisadi arenada qarşısıalınmaz bir hal alan, genişlənən bir gücə çevrilən Çin ilə münasibətlərin inkişaf etdirilməsi bu gün Azərbaycan xarici siyasətinin əsas həlqələrindən birini təşkil edir. Münasibətlərimizdə tamamilə yeni yolun, yeni cığırların açıldığının şahidiyik. Məhz qeyd etdiyimiz etibarlı tərəfdaş, bütöv şəxsiyyət obrazı Çinin də Azərbaycana münasibətində fundamental baxışa sahib olmasını şərtləndirir. İki ölkə liderləri arasında mövcud olan dostluq və səmimi münasibətlər əlaqələrin inkişafına, dərinləşməsinə daha da təkan verir".
Deputat həmçinin Azərbaycan ilə Çin arasında imzalanmış "Azərbaycan Respublikası ilə Çin Xalq Respublikası arasında hərtərəfli strateji tərəfdaşlıq əlaqələrinin qurulması haqqında Birgə Bəyanat" münasibətlərin kökündə dayanan hüquqi çərçivə və bazası olduğunu bildirib: "Dünya siyasətində strateji mahiyyəti ilə seçilən Çin Xalq Respublikası ilə Cənubi Qafqaz siyasətinə istiqamət verən Azərbaycan Respublikası arasında gündən-günə dərinləşən münasibətlər hər şeydən öncə stabilləşmə, sabitləmə, tarazlama və inkişaf deməkdir. Bu münasibətlər Cənubi Qafqazdan başlayıb Mərkəzi Asiya və Avropadan keçərək Asiyaya qədər uzanan, dünyanın böyük bir hissəsini əhatə edən xalqların təhlükəsizliyinə və rifahına xidmət edir".
Elmir Heydərli
12:06 30.09.2025
Oxunuş sayı: 15606
