ABŞ və Azərbaycan arasında imzalanmış saziş enerji əməkdaşlığında yeni mərhələ açır - Deputat
ABŞ və Azərbaycan arasında
Vaşinqtonda imzalanmış ikitərəfli saziş təkcə siyasi və strateji tərəfdaşlığın
güclənməsi ilə məhdudlaşmır, eyni zamanda enerji sahəsində də yeni perspektivlər
açır. ABŞ-ın energetika naziri Kris Raytın qeyd etdiyi kimi, Azərbaycanın zəngin
enerji ehtiyatları Avropaya, xüsusilə də Rusiyadan yan keçən marşrutlarla çıxış
üçün böyük imkanlar yaradır. Bu isə regionda əməkdaşlığın inkişafı, enerji təhlükəsizliyi
və geostrateji balans baxımından xüsusi əhəmiyyət kəsb edir.
Bu barədə Crossmedia.az-a danışan Milli
Məclisin deputatı, Ana Vətən Partiyasının sədr müavini Günay Ağamalı bildirib
ki, ABŞ-la Azərbaycan arasında Vaşinqtonda imzalanmış ikitərəfli saziş ölkələrimiz
arasındakı strateji tərəfdaşlığın daha da güclənməsinə, xüsusilə enerji sahəsində
əməkdaşlığın yeni mərhələyə yüksəldilməsinə imkan yaradır: “Bu saziş Azərbaycanın
artıq uzun illərdir həyata keçirdiyi enerji diplomatiyasının məntiqi davamıdır.
Azərbaycan enerji bazarında digər qlobal aktorlardan fərqli olaraq öz rolundan
siyasi təzyiq vasitəsi kimi istifadə etməyən azsaylı ölkələrdən biridir. Enerji
diplomatiyamız qarşılıqlı faydalı əməkdaşlığa əsaslandığı üçün bir çox dövlətlər,
xüsusilə Avropa ölkələri bizimlə tərəfdaşlıq etməkdə maraqlıdır”.
Deputatın sözlərinə görə, Azərbaycanın
etibarlı tərəfdaş imici, həm ənənəvi, həm də bərpa olunan enerji resurslarının
zənginliyi Birləşmiş Ştatların diqqətini cəlb edən əsas amillərdəndir. Onun
fikrincə, Prezident İlham Əliyevin rəhbərliyi ilə qəbul edilən ardıcıl strateji
qərarlar və həyata keçirilən infrastruktur layihələri ölkəmizi mühüm enerji
qovşağına çevirib: “Azərbaycanın Bakı-Tbilisi-Ceyhan, Bakı-Tbilisi-Ərzurum,
TANAP və TAP kimi nəhəng enerji layihələrinin uğurla icrası nəticəsində Bakı
yalnız regionun deyil, bütövlükdə Avropanın enerji xəritəsində mühüm rol
oynayır. Vaşinqton sazişi isə Azərbaycanın təbii qazının Avropa bazarlarına
Rusiyadan yan keçməklə çatdırılması imkanlarını daha da genişləndirir və
Avropanın enerji təhlükəsizliyinə əlavə töhfələr verir”.
Günay Ağamalı əlavə edib ki, dövlətin
konkret addımları sırasında Cənub Qaz Dəhlizinin ötürücülük gücünün
artırılması, yeni interkonnektorların inşası, külək və günəş enerjisi layihələrinin
ixrac potensialı ilə uzlaşdırılması xüsusi yer tutur. Xəzərin zəngin qaz
ehtiyatlarının səmərəli istifadəsi və mövcud infrastrukturun modernləşdirilməsi
istiqamətində də strateji planlar həyata keçirilir.
Deputat vurğulayıb ki, Azərbaycanın əsas
hədəfi enerji resurslarının ixracı ilə yanaşı, qlobal enerji bazarında sabitlik
və balansın qorunmasına töhfə vermək, beynəlxalq əməkdaşlığı möhkəmləndirməkdir:
“Bu gün Azərbaycan həm ənənəvi enerji resurslarının, həm də alternativ və bərpa
olunan enerji layihələrinin etibarlı təminatçısı kimi beynəlxalq nüfuzunu
artırmaqdadır. Vaşinqtonda imzalanmış saziş isə ölkəmizin enerji siyasətində
yeni üfüqlər açır və Azərbaycanın Avropanın enerji təhlükəsizliyində rolunu daha
da gücləndirir”.
Mehriban Yariyeva
18:09 29.09.2025
Oxunuş sayı: 5774
