27 Sentyabr - Anım Günü münasibətilə Azərbaycan Ordusunda silsilə tədbirlər keçirilib
Müdafiə nazirinin təsdiq etdiyi plana
əsasən, 27 Sentyabr - Anım Günü ilə əlaqədar Azərbaycan Ordusunda silsilə
tədbirlər keçirilib.
Crossmedia.az xəbər verir ki, anım mərasimlərində xalqımızın Ümummilli Lideri Heydər Əliyevin və bütün şəhidlərimizin
əziz xatirələri bir dəqiqəlik sükutla yad edilib. Hərbi orkestrin müşayiəti ilə Azərbaycan
Respublikasının Dövlət Himni oxunub.
Tədbirlərdə
çıxış edənlər Müzəffər Ali Baş Komandanın rəhbərliyi ilə rəşadətli Azərbaycan
Ordusunun qazandığı şanlı Qələbənin tarixi əhəmiyyətindən danışaraq, döyüşlərdə
şəhidlik zirvəsinə yüksələn, eləcə də yaralanaraq sağlamlığını itirən
soydaşlarımızın Vətənə şərəfli xidmətlərindən ehtiramla bəhs ediblər.
Tarixə qızıl
hərflərlə yazılan şanlı Zəfərimizin qazanılmasında Azərbaycan xalqının rolu,
qəhrəman oğullarımızın igidlik və şücaət nümunələri iştirakçıların diqqətinə
çatdırılıb.
Mərasimlərdə
Vətən müharibəsi döyüşlərinin, antiterror əməliyyatı da daxil olmaqla post
müharibə dövründə ordumuzun həyata keçirdiyi uğurlu əməliyyatların regionda
sülhün və əmin-amanlığın bərqərar olunmasına misilsiz töhfələr verdiyi xüsusi
vurğulanıb.
Silsilə
tədbirlər çərçivəsində Şəhidlər xiyabanlarını ziyarət edən hərbi qulluqçular
şəhid məzarlarının üzərinə gül qoyaraq Azərbaycan Respublikasının azadlığı,
ərazi bütövlüyü və suverenliyi uğrunda canlarından keçən əziz soydaşlarımıza öz
ehtiramlarını ifadə ediblər.
Şəxsi heyət üçün hərbi vətənpərvərlik mövzusunda mədəni-kütləvi tədbirlər təşkil olunub, Vətən müharibəsi haqqında sənədli filmlər və videoçarxlar nümayiş etdirilib, döyüş iştirakçıları xatirələrini bölüşüblər.
18:24 27.09.2025
Oxunuş sayı: 5621
