Xarici xəbərlər
Türkiyəli deputat: Türkmənistanlı fəalların deportasiyası dayandırılmalıdır
Türkiyə Böyük Millət Məclisinin üzvü və tanınmış hüquq müdafiəçisi Ömər Faruk Gergerlioğlu türkmənistanlı müxalif aktivistlər Abdullah Orusov və Alişer Səhatovun deportasiyasının dərhal dayandırılması tələbi ilə çıxış edib.
Crossmedia.az xəbər verir ki, Gergerlioğlu bu barədə Türkiyə parlamentində məhkəmə islahatları üzrə keçirilən mətbuat konfransında məlumat verib.
O, çıxışı zamanı Orusov və Səhatovun portretlərini nümayiş etdirərək, onların Türkmənistana qaytarılmasının həyati təhlükə yaradacağını vurğulayıb.
“Bütün dünya bilir ki, Türkmənistanda demokratiya yoxdur. Türkiyə hökuməti bu şəxsləri deportasiya mərkəzlərinə göndərməklə onların həyatını risk altına atır. Onların dərhal buraxılmasını və deportasiya prosesinin dayandırılmasını tələb edirik”, - deyə Gergerlioğlu bildirib.
Deputat həmçinin diqqətə çatdırıb ki, son illər Türkiyədə sığınacaq axtaran Mərkəzi Asiya mənşəli siyasi fəalların hüquqları beynəlxalq insan hüquqları təşkilatları tərəfindən də qlobal müzakirə mövzusuna çevrilib. Berdimuhamedow administrasiyasının müxalifətə qarşı sərt təqibləri fonunda, Gergerlioğlu Türkiyə hökumətinə çağırış edərək, insan hüquqlarına adekvat hörmətlə yanaşmağa səsləyib.
23:14 19.06.2025
Oxunuş sayı: 11141
