Türkiyə XİN: “Netanyahu və onun əlaltıları ədalət qarşısında cavab verəcək”
Türkiyə Xarici İşlər Nazirliyi İsrailin xarici işlər nazirinin Türkiyə və Prezident Rəcəb Tayyib Ərdoğanla bağlı açıqlamasına sərt reaksiya verib.
Crossmedia.az xəbər verir ki, nazirliyin yaydığı bəyanatda qeyd olunub:
“İsrailin xarici işlər nazirinin sosial media hesabında yer alan paylaşımı ölkəmizə və cənab prezidentimizə qarşı əsassız böhtanlar və alçaq yalanlardan ibarətdir. İsrail rəsmilərinin prezidentimizin açıqlamalarına bu qədər diqqət yetirməyə məcbur qalması, həmin bəyanatda səsləndirilən məsələlərin nə qədər doğru olduğunu göstərir”.
Bəyanatda İsrailin baş naziri Benyamin Netanyahuya da sərt ittiham yönəldilib:
“Netanyahunun adının tarixdə soyqırımlar törətmiş şəxslərlə yanaşı çəkilməsinə səbəb olan, hal-hazırda isə soyqırım törətməkdə mühakimə olunan şəxs məhz özüdür. İsrail rəhbərliyinin bütün dünyanın gözü qarşısında bəşəriyyətə qarşı törətdiyi cinayətlər heç bir şübhəyə yer qoymayacaq şəkildə sənədləşdirilir”.
Türkiyə XİN vurğulayıb ki, İsrailin bəzi beynəlxalq dairələrdən aldığı dəstək və toxunulmazlıq aradan qalxdıqda, Netanyahu və onu dəstəkləyən şəxslər mütləq ədalət qarşısında cavab verməli olacaqlar:
“Prezidentimizin də qeyd etdiyi kimi, Netanyahu və onun işbirlikçilərinin ədalətli şəkildə mühakimə olunacağına ümid edirik”.
21:28 18.06.2025
Oxunuş sayı: 575
