Macarıstan və Slovakiya Aİ-nin enerji planına qarşı çıxır
Macarıstan və Slovakiya Avropa İttifaqının Rusiya qazı və neftindən asılılığı azaltmaq üçün irəli sürdüyü yeni enerji təhlükəsizliyi planına etiraz edib.
Avropa Komissiyası 2027-ci ilin sonuna qədər Rusiya təbii qazı və mayeləşdirilmiş təbii qazın (LNG) idxalını tam qadağan etməyi hədəfləyən qanun layihəsi hazırlayıb. Plan Aİ daxilində mübahisələrə səbəb olub.
Crossmedia.az xarici mediaya istinadən bildirir ki, Macarıstanın xarici işlər naziri Peter Siyarto bu təşəbbüsə veto qoyduqlarını bəyan edib. O, enerji siyasətinin milli səlahiyyət olduğunu vurğulayaraq bildirib: “Bu plan ölkəmizin suverenliyini və enerji təhlükəsizliyini təhlükə altına qoyur. Yaxın Şərqdə gərginliyin artdığı bir vaxtda belə təşəbbüslərdən çəkinmək lazımdır”.
Danimarka və Polşa isə planı dəstəkləyir. Polşanın iqlim və ətraf mühit naziri Paulina Hennig-Kloska bildirib: “Avropanın enerji təhlükəsizliyi onun suverenliyindən asılıdır. İndi hərəkətə keçməyin vaxtıdır”.
Avropa Komissiyası yeni qanun layihəsinin üzv ölkələrin səs çoxluğu ilə qəbul olunmasına çalışır. Qanunun qəbul edilməsi üçün 27 üzv dövlətdən ən azı 15-nin və Aİ əhalisinin 65%-nin dəstəyi tələb olunur.
Statistikaya əsasən, Aİ Rusiyadan qaz idxalını 2021-ci ildəki 45%-dən 2024-cü ildə 19%-ə, xam neft idxalını isə 2022-ci ildəki 27%-dən 2024-cü ildə 3%-ə endirib. Lakin Rusiya hələ də Aİ-yə enerji və nüvə materialları ixrac edir.
Zəhra Ağayeva
14:05 17.06.2025
Oxunuş sayı: 869
