Paris Airshow-da 4 İsrail şirkətinin stendi bağlandı
Paris Airshow aviasiya sərgisində İsrailin dörd əsas müdafiə sənayesi şirkətinin stendi Fransa rəsmilərinin göstərişi ilə bağlanıb. Səbəb kimi stendlərdə bomba və digər hücum silahlarının nümayiş etdirilməsi göstərilib.
Crossmedia.az xəbər verir ki, Reuters-ə danışan mənbənin sözlərinə görə, bu qərar Fransanın təhlükəsizlik qurumlarının israilli firmalara hücum və kinetik silahları stendlərdən yığışdırmaq göstərişinə əməl etmədiklərinə görə verilib.
Qapadılan stendlər Elbit Systems, Rafael, IAI və Uvision şirkətlərinə məxsus olub. Eyni zamanda, İsrail Müdafiə Nazirliyinin və üç kiçik şirkətin nümayiş etdirdiyi digər stendlər fəaliyyətini davam etdirib.
İsrail müdafiə nazirliyi məsələ ilə bağlı açıqlamasında bildirib ki, Fransa gecə saatlarında gizli şəkildə bu stendlərin ətrafına böyük qara panellər yerləşdirib. Nazirlik rəsmi Parisə panellərin geri çəkilməsi çağırışı edib.
Fransa və İsrailin yaxın müttəfiq olmasına baxmayaraq, Prezident Emmanuel Makronun İsrailin Qəzzadakı hərbi əməliyyatlarına artan tənqidləri səbəbilə son aylarda iki ölkə arasında münasibətlər soyuyub.
Qeyd edək ki, cümə günü İsrailin İrana raket zərbələri endirməsindən sonra Makron İranı regionda sabitliyi pozmaqda məsul tutsa da, İsraili təmkinli olmağa çağırıb.
Mədinə Cəlilova
05:00 17.06.2025
Oxunuş sayı: 796
