Netanyahu: “Bu, xeyirlə şərin müharibəsidir – Amerika doğru tərəfdə dayanmalıdır”
İsrailin baş naziri Benyamin Netanyahu Yaxın Şərqdə baş verən son hadisələrlə bağlı kəskin açıqlama verib.
Crossmedia.az xarici mətbuata istinadən xəbər verir ki, o, bölgədəki qarşıdurmaların səbəbini İran rejiminin uzunmüddətli təcavüzkar siyasəti ilə əlaqələndirib.
“Bu rejim tərəfindən Yaxın Şərqdə hər kəsi qorxu içində saxlayan və yarım əsrdir davam edən qarşıdurmaların şahidi olmuşuq. Əbədi müharibə İranın istədiyidir və onlar bizi nüvə müharibəsinin astanasına gətirirlər”, – deyə Netanyahu bildirib.
İsrail lideri ölkəsinin atdığı addımların nüvə müharibəsinin qarşısını almağa və təcavüzü dayandırmağa yönəldiyini vurğulayıb: “Biz bunu yalnız şər qüvvələrinə qarşı durmaqla edə bilərik”.
Netanyahu ABŞ-nin bu mübarizədə yerini də aydın şəkildə ifadə edib: “Onlar ‘Amerikaya ölüm’ deyə qışqırırlar. Biz isə bəşəriyyətə xidmət edən bir işi görürük – bu, xeyirlə şərin savaşıdır. Amerika xeyirin tərəfində dayanır, dayanmalıdır və dayanır da”.
O, Prezident Donald Trampın bu istiqamətdəki mövqeyini yüksək qiymətləndirdiyini bildirib və İranla aparılan danışıqların etibarsız olduğunu vurğulayıb:
“İran saxta danışıqları davam etdirmək istəyir. Orada yalan danışırlar, aldatmağa çalışırlar, ABŞ-ni boş yerə ümidlə saxlayırlar. Bilirsiniz, bu barədə çox möhkəm kəşfiyyat məlumatlarımız var”.
Netanyahu İranın hələ də nüvə silahı və ballistik raketlər üzərində işlədiyini və bu silahları İsrail ərazisinə atdığını bildirib. O, bu fəaliyyətin danışıqlarla paralel davam etdiyini və İsrail üçün ikiqat təhlükə yaratdığını deyib:
“Bu, baş verməyəcək. Biz yalnız öz düşmənimizlə deyil, sizin düşməninizlə də mübarizə aparırıq. Allahın xeyirinə, onlar ‘İsrailə ölüm, Amerikaya ölüm’ şüarları səsləndirirlər. Biz sadəcə onların yolundayıq və bu, tezliklə Amerikaya da çata bilər”.
02:00 17.06.2025
Oxunuş sayı: 838
