ABŞ İsrail-İran müharibəsindən uzaq durmağa çalışır – Tramp təzyiq altındadır
ABŞ Prezidenti Donald Tramp ölkəsini İsrailin İranla müharibəsində birbaşa iştirakdan kənarda saxlamağa çalışır.
Crossmedia.az xəbər verir ki, CNN-in məlumatına görə, Tramp həftəsonu İsrailin Ayətullah Əli Xameneini hədəf alan planını tammiqyaslı eskalasiyadan ehtiyatlanaraq rədd edib. Lakin ona qarşı təzyiqlər artır – yalnız xaricdən deyil, ölkə daxilindən də.
Respublikaçılar arasında hərbi müdaxiləyə çağırışlar artır. ABŞ-nin keçmiş vitse-prezidenti Mayk Pens bəyan edib ki, diplomatik səylər uğursuz olarsa, Vaşinqton İsrailə İranın nüvə proqramını məhv etməkdə kömək etməyə hazır olmalıdır.
Bununla yanaşı, CNN qeyd edir ki, Trampın özü genişmiqyaslı hərbi əməliyyatlara skeptik yanaşır və seçiciləri arasında dəstək itkisinə səbəb ola biləcəyindən narahatdır.
Ekspertlər bildirirlər ki, Tramp strateji seçim qarşısındadır: Onun “Birinci Amerika” siyasi xətti Yaxın Şərqdə uzunmüddətli münaqişələrə qarşı çıxır, lakin yaranmış yeni reallıq onu bu prinsiplərdən geri çəkilməyə məcbur edə bilər.
00:00 17.06.2025
Oxunuş sayı: 777
