Ukraynalı hərbçi və mülki şəxslərin cəsədləri Kiyevə təhvil verildi
İstanbulda iyunun2-də keçirilən danışıqlar nəticəsində əldə olunan razılaşmaya əsasən, Rusiya tərəfi 1.200 ukraynalı hərbçi və mülki şəxsin cəsədini Ukraynaya təhvil verib.
Crossmedia.az xəbər verir ki, bu barədə Ukraynanın Hərbi Əsir Məsələləri üzrə Koordinasiya Mərkəzi Telegram kanalında məlumat yayıb. Bildirilib ki, İstanbulda əldə olunan razılaşmalara uyğun olaraq, cəsədlərin qaytarılması prosesi davam edir:
“Rusiya tərəfinin verdiyi məlumata görə, hərbi qulluqçular da daxil olmaqla, 1.200 Ukrayna vətəndaşının cəsədi Ukraynaya təhvil verilib”.
Məlumatda qeyd olunur ki, Beynəlxalq Qızıl Xaç Komitəsi (ICRC) və Ukraynanın aidiyyəti qurumları cəsədlərin geri qaytarılması prosesi zamanı fəal iştirak edib. Həmçinin yaxın günlərdə həyatını itirən hərbçi və mülki şəxslərin kimliklərinin müəyyən olunması istiqamətində iş aparılacağı vurğulanıb.
Rus mətbuatı isə öz mənbələrinə istinadla bildirib ki, Rusiya tərəfi İstanbulda əldə olunan razılaşma əsasında 1.200 ukraynalı hərbçinin cəsədini təhvil verib, lakin Ukrayna tərəfi rus hərbçilərinin cəsədlərini geri qaytarmayıb.
Xatırladaq ki, Türkiyənin ev sahibliyi ilə 2 iyun tarixində İstanbulda Rusiya və Ukrayna nümayəndələri arasında keçirilən görüş zamanı dondurulmuş 6 min ukraynalı hərbçinin cəsədinin qaytarılması, ağır yaralı və xəstə əsirlərin, eləcə də 25 yaşadək hərbi əsirlərin dəyişdirilməsi ilə bağlı razılıq əldə olunmuşdu.
Razılaşma çərçivəsində 9, 10, 12 və 14 iyun tarixlərində Ukrayna ilə Rusiya arasında dörd mərhələdə əsir mübadiləsi həyata keçirilib.
Ukrayna tərəfi iyunun 11-də 1.212 ukraynalı hərbçinin cəsədinin Rusiyadan təhvil alındığını açıqlamış, Rusiya isə qarşılığında 27 rus hərbçisinin cəsədinin qaytarıldığını bildirmişdi.
Bundan əlavə, Ukrayna tərəfi 13 və 14 iyun tarixlərində ümumilikdə 2.400 ukraynalı hərbçi və mülki şəxsin cəsədinin Rusiyadan alındığını açıqlayıb.
Rusiyanın TASS agentliyinə danışan mənbə isə 13 və 14 iyun tarixlərində cəsədlərin Ukraynaya təhvil verildiyini, lakin Ukrayna tərəfindən rus hərbçilərinin cəsədlərinin qaytarılmadığını bildirib.
Mədinə Cəlilova
17:50 15.06.2025
Oxunuş sayı: 631
