SEPAH: "İsrail və tərəfdaşları cavabını alacaq!"
İran İslam İnqilabı Keşikçiləri Korpusu (SEPAH) İsrailin İrana qarşı həyata keçirdiyi hərbi hücuma cavab olaraq sionist rejimin, həmçinin onun regional və beynəlxalq tərəfdaşlarının sərt və mütənasib cavabla üzləşəcəyini bəyan edib.
Crossmedia.az İRNA-ya istinadən veridiyi xəbərə görə, SEPAH-ın İctimaiyyətlə Əlaqələr İdarəsinin yaydığı məlumatda bildirilib ki, hücum nəticəsində aralarında qadınlar, uşaqlar və elm adamlarının da olduğu çoxsaylı mülki şəxs həlak olub, yüksək rütbəli hərbi rəhbərlik hədəfə alınıb.
Rəsmi məlumata görə, hücum zamanı İran Silahlı Qüvvələrinin Baş Qərargah rəisi general-polkovnik Məhəmməd Baqeri, SEPAH-ın Baş Komandanı general-polkovnik Hüseyn Səlami, “Xatəmül-Ənbiya” qərargahının komandanı general Qulaməli Rəşid və SEPAH Aerokosmik Qüvvələrinin komandanı briqada generalı Əmirəli Hacızadə həyatını itirənlər arasındadır.
Bəyanatda general Hacızadənin İranın raket və müdafiə proqramının inkişafında oynadığı mühüm rol xüsusi olaraq vurğulanıb.
O, SEPAH tərəfindən “Müqavimət Cəbhəsinin ən təsirli simalarından biri”, “yenilik, güc və irəliləyiş rəmzi” kimi təqdim olunub.
Qurumun məlumatında qeyd olunur ki, cavab tədbirləri uyğun zaman və məkanda həyata keçiriləcək və hücumun təşəbbüskarları ağır nəticələrlə üzləşəcəklər.
19:33 13.06.2025
Oxunuş sayı: 1104
