Livan və Fələstin arasında razılaşma: Silahlı qruplar tərksilah ediləcək
Livan Prezidenti Cozef Aun və Fələstin rəhbəri Mahmud Abbas, fələstinli silahlı qrupların Livan ərazisindən İsrailə hücumlar üçün istifadə etməyəcəyinə və bu qrupların iyun ayından etibarən tədricən silahsızlaşdırılmasına dair razılıq əldə ediblər.
Bu razılaşma son yeddi ildə ilk dəfə Livana üçgünlük səfər edən Mahmud Abbas ilə Cozef Aun arasında keçirilən görüş zamanı əldə olunub.
Livan hakimiyyəti xüsusilə İsraillə sərhəddə yerləşən cənub bölgələrdə dövlət nəzarətini bərpa etməyə çalışır. Bu səylər ABŞ-nin vasitəçiliyi ilə noyabrda başa çatan və 14 ay davam edən İsrail- “Hizbullah” münaqişəsindən sonra daha da intensivləşib.
Crossmedia.az xəbər verir ki, BMT-nin UNRWA agentliyinin məlumatına görə, Livanda təxminən 222 min fələstinli qaçqın yaşayır. Onların əksəriyyəti Livan dövləti yurisdiksiyasından kənarda olan və həddindən artıq dolu olan 12 rəsmi qaçqın düşərgəsində məskunlaşıb. Bu düşərgələrdə fəaliyyət göstərən silahlı fələstinli qruplar zaman-zaman İsrail mövqelərinə hücumlar təşkil edirlər.
Qeyd edək ki, Livandakı fələstinli qaçqınlar ciddi sosial və hüquqi məhdudiyyətlərlə üzləşirlər. Onlara bir sıra peşələrdə işləmək, daşınmaz əmlak sahibi olmaq və digər əsas hüquqlardan istifadə etmək qadağandır.
2023-cü il oktyabrın 7-də “Həmas”ın İsrailin cənubuna hücumundan sonra başlayan və bir ildən çox davam edən İsrail–“Hizbullah” qarşıdurması dövründə “Həmas” Livan ərazisindən İsrailə hücumlar təşkil etdiyini bəyan etmişdi.
Bu ay Livan ordusu ölkənin şimalında yerləşən Əl-Beddavi fələstinli qaçqın düşərgəsində 800 raket ələ keçirib. Bundan əvvəl, mart ayında İsrailə atəş açmaqda şübhəli bilinən bir neçə fələstinli də saxlanılıb.
Mədinə Cəlilova
10:40 25.05.2025
Oxunuş sayı: 793
