Suriya üçün yeni səhifə: Sanksiyalar aradan qaldırıldı
Amerika Birləşmiş Ştatlarının Prezidenti Donald Tramp, Səudiyyə Ərəbistanının paytaxtı Ər-Riyadda keçirilən səfəri zamanı Suriyaya qarşı tətbiq edilən sanksiyaların ləğv ediləcəyini açıqlayıb. Tramp bildirib ki, Türkiyə Prezidenti Rəcəb Tayyib Ərdoğanla apardığı telefon danışığında da bu məsələ gündəmə gəlib və regiondakı digər müttəfiqlər də sanksiyaların aradan qaldırılmasını istəyiblər.
Crossmedia.az ABŞ xəzinə nazirliyindən verilən məlumata istinadən xəbər verir ki, Trampın açıqlamasının ardından Suriyaya qarşı sanksiyaların aradan qaldırılması üçün “Ümumi Lisenziya 25” (General License 25 – GL 25) qüvvəyə minib. Nazirliyin Xarici Aktivlərə Nəzarət Ofisi (OFAC) tərəfindən yayımlanan bu lisenziya, Suriyaya qarşı mövcud olan bir çox qadağanı aradan qaldıraraq sanksiyaları faktiki olaraq ləğv edib.
ABŞ xəzinə naziri Skott Bessent, “Prezident Trampın verdiyi sözə uyğun olaraq, Xəzinə və Dövlət Departamentləri Suriya üçün yeni sərmayələri təşviq edən addımlar atmağa başlayıb. Ümid edirik ki, Suriya sabitlik və rifah yolunda irəliləyəcək”, – deyə bildirib.
Yeni lisenziya çərçivəsində 2020-ci ildə qüvvəyə minmiş Sezar Sanksiya Qanununa da (Caesar Act) müəyyən istisnalar tətbiq edilib. Bu istisnalar ABŞ-nin müttəfiqlərinə və region ölkələrinə Suriya ilə iqtisadi əməkdaşlıq imkanlarını qiymətləndirməyə şərait yaradır. Hökumət tərəfindən verilən qərarla, Suriya iqtisadiyyatının müxtəlif sahələrində fəaliyyətə, yeni sərmayələrə, texniki və maliyyə xidmətlərinə, neft və neft məhsulları ilə bağlı əməliyyatlara, həmçinin yeni qurulmuş Suriya hökuməti ilə kommersiya əlaqələrinə icazə verilib.
GL 25 çərçivəsində keçmiş Bəşər Əsəd rejiminə və insan haqlarının pozulmasında rol oynamış şəxslərə tətbiq olunan sanksiyalar qüvvədə qalır. Eyni zamanda Rusiya, İran və Şimali Koreya kimi Əsəd rejiminin keçmişdəki dəstəkçiləri də bu lisenziyadan kənarda saxlanılıb.
ABŞ Hökuməti, GL 25-in məqsədinin Suriyanın maliyyə sistemini, infrastrukturunu və ümumi iqtisadi strukturunu yenidən qurmaq olduğunu bəyan edib. Mali Suçları Uygulama Şəbəkəsi (FinCEN) tərəfindən Suriya Ticarət Bankına ABŞ maliyyə qurumlarında müxbir hesab açmağa icazə verildiyi də bildirilib.
ABŞ xəzinə nazirliyinin açıqlamasında qeyd olunub ki, Əsəd rejiminin öz xalqına qarşı zorakılığa və terrora dəstəyinə son qoyulduğu hesab olunur və bu qərar Suriya xalqı üçün yeni bir başlanğıc kimi qiymətləndirilir. Vaşinqton administrasiyası, Suriyada qurulan yeni hökumətin fəaliyyətlərini və bölgədəki vəziyyəti yaxından izləməyə davam edəcəyini də bəyan edib.
Avropa İttifaqı da ABŞ-nin qərarından sonra oxşar addım ataraq Suriyaya qarşı iqtisadi sanksiyaları ləğv etdiyini açıqlayıb. Brüsseldə keçirilən Aİ xarici işlər nazirləri toplantısından sonra Aİ-nin Xarici Siyasət və Təhlükəsizlik üzrə Ali Nümayəndəsi Kaja Kallas, “Suriya xalqının yeni, inklüziv və dinc bir Suriya inşa etməsinə yardım etmək istəyirik”, – deyə bildirib.
Yeni qərara əsasən, Aİ üzvü ölkələrin Suriya ilə təhlükəsizlik, miqrasiya, bərpa və inkişaf sahələrində əməkdaşlıq üçün maliyyə ayırmalarına, eyni zamanda Suriya Mərkəzi Bankının beynəlxalq fəaliyyətə qayıtması üçün məhdudiyyətlərin aradan qaldırılmasına icazə verilib.
Mədinə Cəlilova
23:37 24.05.2025
Oxunuş sayı: 5973
