Qəzzada ailə faciəsi: İsrail ordusu 9 uşağın həyatına son qoydu
İsrail ordusunun Qəzzanın cənubundakı Xan Yunis şəhərinə endirdiyi hava zərbəsi nəticəsində Nasser xəstəxanasında çalışan pediatr Ela əl-Nəccarın evinə raket düşüb.
Crossmedia.az xarici KİV-ə istinadən xəbər verir ki, nəticədə onun 10 övladından 9-u həyatını itirib, həyat yoldaşı Həmdi əl-Nəccar və 11 yaşlı bir övladı isə ağır yaralanıb.
Qəzza Səhiyyə Nazirliyinin baş direktoru Munir əl-Burşun verdiyi məlumata görə, Həmdi əl-Nəccar həyat yoldaşını xəstəxanaya çatdırdığı anda evlərinə zərbə endirilib.
“Ağrını sözlə ifadə etmək mümkün deyil. Bu hücum, bölgədəki səhiyyə işçilərinin üzləşdiyi real təhlükəni açıq şəkildə göstərir. Artıq yalnız tibb işçiləri deyil, onların bütün ailələri də hədəf alınır”, – deyə əl-Burş vurğulayıb.
Qəzza Səhiyyə Nazirliyinin "Telegram" kanalında yayılan məlumatda bildirilib ki, Nasser xəstəxanasının həkimlərindən Yusur Ebu ər-Riş pediatr Ela əl-Nəccarın oğlunun əməliyyat otağının qarşısında səbir və kədər içində gözlədiyini deyib:
“O, 9 övladını itirməsinə baxmayaraq, yenə də xəstə uşaqlara yardım etməyə çalışırdı”.
Qeyd edək ki, yanvarın 19-da elan edilən atəşkəsin pozulmasından sonra, martın 18-dən etibarən İsrail ordusu hücumlarını yenidən bərpa edib.
Həmin tarixdən bu yana, əksəriyyəti qadınlar, uşaqlar və yaşlılardan ibarət olmaqla, 3 747 fələstinli həyatını itirib, 10 552 nəfər isə yaralanıb.
Ümumilikdə, 7 oktyabr 2023-cü ildən bəri Qəzza zolağında həyata keçirilən hərbi əməliyyatlarda ölənlərin sayı 53 901-ə, yaralananların sayı isə 122 593-ə yüksəlib.
İsrail hökumətinin bölgədə işğalı genişləndirmək niyyətində olduğu bildirilir.
Baş nazir Benyamin Netanyahu Qəzza zolağının tam nəzarət altına alınmasının planlaşdırıldığını bəyan edib. Plana əsasən, bölgənin cənubundakı fələstinlilər “toplama düşərgələrinə” köçürüləcək və daha sonra digər ölkələrə deportasiya olunacaqlar.
İsrail hökumətində bəzi nazirlik nümayəndələri isə Qəzzadan “toxunulmamış heç nə” buraxmayacaqlarını və fələstinlilərin tam çıxarılmasını hədəflədiklərini bildiriblər.
21:29 24.05.2025
Oxunuş sayı: 996
