İsrail-Qərb münasibətlərində yeni gərginlik: Jenində xəbərdarlıq atəşi
İsrail ordusunun əsgərləri çərşənbə günü İordan çayının işğal olunmuş qərb sahilində yerləşən Jenin şəhərində Qərbli diplomatlar, Fələstin rəsmiləri və jurnalistlərdən ibarət nümayəndə heyətini dağıtmaq üçün havaya xəbərdarlıq atəşi açıblar. Hadisə ilə bağlı həm İsrail ordusu, həm də Fələstin Muxtariyyəti məlumat yayıb.
Crossmedia.az xarici KİV-ə istinadən xəbər verir ki, hadisə yerindən çəkilmiş televiziya görüntülərində atəş səsləri açıq şəkildə əks olunub.
Hadisə nəticəsində xəsarət alan olmasa da, bu insident İsrail ilə beynəlxalq tərəfdaşları arasında artmaqda olan gərginliyi daha da dərinləşdirib. Qeyd edək ki, bu Britaniya, Fransa və Kanadanın İsraili Qəzza müharibəsini dayandırmağa çağırmasından iki gün, Britaniyanın İsraillə ticarət danışıqlarını dayandırmasından və İordan çayının qərb sahilindəki yaşayış məntəqələrinə dəstəyə görə İsraili tənqid etməsindən bir gün sonraya təsadüf edir.
Britaniya, Fransa və Kanada nümayəndələrinin də yer aldığı diplomatik heyət Jenin şəhərində Fələstin Muxtariyyətinin təşkil etdiyi müşahidə turunda iştirak edirdi. Turun məqsədi İsrail ordusunun silahlı qruplara qarşı əməliyyatlar çərçivəsində şəhərin kənarında yerləşən və əsasən 1948-ci il müharibəsindən sonra didərgin düşmüş fələstinlilərin nəslindən olanların yaşadığı Jenin qaçqın düşərgəsinin bir hissəsini nəzarətə götürməsi və qismən dağıtması barədə beynəlxalq ictimaiyyətə məlumat vermək idi.
Təsdiqlənmiş video görüntülərə əsasən, tur başa çatmağa yaxın ərazidə olan İsrail əsgərləri qapalı darvazanın digər tərəfində dayanan nümayəndə heyətinə ən azı yeddi dəfə atəş açıblar. Atəş açılan zaman bəzi rəsmilər jurnalistlərə müsahibə verirdi və əsgərlərə arxa çevirmişdilər. Hadisədən dərhal sonra nümayəndə heyəti ərazidən uzaqlaşıb və bəzi şəxslər yan küçələrdə sığınacaq tapıblar.
Qeyd edək ki, bu hadisə, 2022-ci ilin mayında tanınmış fələstinli jurnalist Şirin Əbu Əqlənin İsrail əsgəri tərəfindən öldürüldüyü əraziyə yaxın bir ərazidə baş verib.
Mədinə Cəlilova
15:30 22.05.2025
Oxunuş sayı: 638
