Litva Belarusdan Beynəlxalq Məhkəməyə şikayət etdi
Litva Belarus hökumətini miqrantların kütləvi şəkildə ölkəyə gətirilməsini təşkil etməkdə ittiham edərək, Haaqa şəhərində yerləşən BMT-nin Beynəlxalq Ədalət Məhkəməsinə müraciət edib. Bu barədə Litva Xarici İşlər Nazirliyi məlumat yayıb. Məlumatda qeyd olunur ki, məsələ qeyri-qanuni miqrant daşımaları ilə bağlı BMT protokolunun pozulması ilə əlaqəlidir.
Crossmedia.az xarici mediaya istinadən bildirir ki, rəsmi Vilnüs Belarusun bu miqrant axınını məqsədli şəkildə təşkil etdiyini və onları Litva sərhədinə qədər müşayiət etdiyini iddia edir. Litva tərəfi Minsk hökumətindən dəyən zərərin tam şəkildə ödənilməsini tələb edir.
Litva hökumətinə görə, bu proses nəticəsində ölkəyə böyük iqtisadi və sosial yük düşüb. Hökumət bildirib ki, sərhəddə qurulan müdafiə sədlərinin tikintisi də daxil olmaqla, bütün xərclər Belarus tərəfindən qarşılanmalıdır.
Qeyd edək ki, Litva son illərdə qeyri-qanuni miqrasiya ilə bağlı ciddi problemlərlə üzləşib və bu məsələ Avropa İttifaqı daxilində də ciddi narahatlıq doğurur. Vilnüs bu addımı beynəlxalq hüquq normalarının qorunması və gələcəkdə oxşar hallar üçün presedent yaratmaq məqsədilə atdığını bildirib.
Fatimə Nəbiyeva
22:31 19.05.2025
Oxunuş sayı: 688
