Fransa Hindistanın “Rafale” qırıcıları ilə bağlı tələbini rədd etdi
Fransa Hindistanın “Rafale” qırıcı təyyarələrinə yerli istehsal silah və sistemlərin inteqrasiyası üçün istədiyi mənbə kodlarını təqdim etməkdən imtina edib.
Crossmedia.az xarici mediaya istinadən bildirir ki, Hindistan bu kodları ölkədə istehsal olunan raketlər, bombalar və elektron sistemləri “Rafale” təyyarələrinə inteqrasiya etmək üçün tələb edib. Bu, Hindistanın müdafiə sənayesində xarici asılılığı azaltmaq məqsədi ilə atdığı addımlar çərçivəsində nəzərdə tutulurdu.
Lakin “Dassault Aviation” şirkəti Hindistana qırıcıların idarəetmə sistemlərini təmin edən kodları “kategorik” şəkildə təqdim etməyib. Fransız tərəfi bu kodların strateji və təhlükəsizlik səbəblərinə görə gizli saxlanıldığını bildirib.
Qeyd edək ki, Hindistan 2016-cı ilin sentyabrında təxminən 7,8 milyard avro dəyərində müqavilə imzalayaraq Fransadan 36 ədəd “Rafale” qırıcısı alıb. Bu təyyarələr Hindistanın Haryanadakı Ambala və Qərbi Benqaliyadakı Hasimara hərbi hava bazalarında yerləşdirilib.
Zəhra Ağayeva
18:00 19.05.2025
Oxunuş sayı: 776
