Türk Dövlətləri Mərkəzi Seçki Komissiyalarının Məşvərət Platforması yaradıldı
Qazaxıstan Prezidenti Qasım-Jomart Tokayevin təşəbbüsü ilə Türk Dövlətləri Təşkilatının (TDT) himayəsi altında Türk Dövlətləri Mərkəzi Seçki Komissiyalarının Məşvərət Platforması təsis edilib. Platformanın birinci iclası 2025-ci il mayın 14-də Qazaxıstanın Türküstan şəhərində baş tutub. “Türk Dünyasının Mənəvi Paytaxtı” kimi tanınan bu şəhərdə keçirilən toplantı türk dövlətləri arasında seçki sahəsində əməkdaşlığın gücləndirilməsi baxımından mühüm hadisə kimi dəyərləndirilir.
Crossmedia.az xəbər verir ki, iclasda Türk Dövlətləri Təşkilatına üzv ölkələrin Mərkəzi Seçki Komissiyalarının rəhbərləri iştirak ediblər.
Görüş zamanı platformanın yaradılmasını rəsmiləşdirən Əsasnamə sənədi imzalanıb. Təsis sənədi qurumlar arasında təcrübə və informasiya mübadiləsinin intensivləşdirilməsinə, eləcə də demokratik seçki praktikasının yayılmasına töhfə verəcək.
Məşvərət Platformasının yaradılması türk dövlətləri arasında seçki orqanlarının fəaliyyətində koordinasiyanın artırılmasını, birgə layihələrin həyata keçirilməsini və ümumi demokratik dəyərlərin təşviqini hədəfləyir. Bu təşəbbüs həm də regionda sabitliyin və siyasi etimadın möhkəmləndirilməsi baxımından əhəmiyyət daşıyır.
Yeni platforma çərçivəsində gələcəkdə ortaq treninqlər, seminarlar və seçki müşahidə missiyalarının təşkili nəzərdə tutulur. Bu, tərəfdaş ölkələr arasında qarşılıqlı dəstəyin güclənməsinə və seçki proseslərinin beynəlxalq standartlara uyğun aparılmasına şərait yaradacaq.
Fatimə Nəbiyeva
18:39 14.05.2025
Oxunuş sayı: 699
