SSRİ bayrağı altında “Qələbə sevinci" - kimə qarşı, kimə rəğmən?!
9 May İmişli rayonunun Sarıxanlı kəndində keçirilən “Qələbə günü” tədbiri yadda qalan olmadı, əksinə, yadda qalan ləkəyə çevrildi. Sosial şəbəkələrdə yayılan görüntülərdə SSRİ bayrağının dalğalanması və rus imperiyasının simvolu olan “Georgi lenti” ilə çıxış edən bir ağsaqqal — bəli, məhz ağsaqqal statusu daşıyan bir şəxsin bu addımı nə qədər düzgündür? Bu adam ağsaqqal adına nə qədər layiqdir?
Rayon Ağsaqqallar Şurasının sədri Saleh Səmədovun SSRİ bayrağı fonunda, sinəsində “Georgi lenti” ilə danışması sadəcə bir şəxsi zövq, ya da nostalji sayıla bilməz. Bu, həm tarixə, həm şəhidlərə, həm də dövlətçiliyə qarşı açıq hörmətsizlikdi. SSRİ bayrağı — Azərbaycanı illərlə susdurmuş, milli kimliyini və ləyaqətini tapdalayan bir imperiyanın rəmzidir. O bayrağın altında minlərlə azərbaycanlı sürgün edildi, öldürüldü, dili qadağan olundu. İndi hansı vicdanla o bayrağı yenidən dalğalandırırsan?!
İnsan soruşur: bu tədbirin təşkilatçıları haradaydı? Rayon rəhbərliyi nə düşünürdü? Bəs “ağsaqqal” titulu verilən şəxslər xalqın yanında olmalı deyilmi? Əgər bir ağsaqqal xalqı təmsil eləmirsə, imperiya simvollarına sığınırsa, o artıq ağsaqqal deyil — o, sadəcə köhnə düzənin havadarına çevrilmiş bir kölgədir.
Ağsaqqallar Şurasının İdarə Heyətinin üzvü Misir Mərdanovun dediyi “bu hərəkəti pisləyirəm və yanlış addım hesab edirəm” fikri tam yerində mövqedir. Lakin cəmiyyət artıq mövqe yox, tədbir gözləyir. Bu tədbir də gecikmədi.
Bu gün Azərbaycan Ağsaqqallar Şurasının idarə heyətinin iclası keçirildi.
İdarə Heyəti Şuranın adına ləkə gətirən hərəkətlərə yol verdiyinə, Azərbaycan Ağsaqqallar Şurasının Nizamnamə tələblərini kobud şəkildə pozduğuna görə Saleh Səmədovun İmişli Rayon Ağsaqqallar Şurasının sədri vəzifəsindən azad edilməsi, o cümlədən Azərbaycan Ağsaqqallar Şurasının üzvlüyündən çıxarılması barədə qərar qəbul edib. Azərbaycan Ağsaqqallar Şurasının aparatına yerli bölmələrin fəaliyyətinə nəzarətin artırılması barədə tapşırıqlar verilib.
Tam yerinde və vaxtında verilən bir qərardır. Sadəcə araşdırmaq lazımdır ki, vətənpərvərliyin nə olduğunu bilməyən, Respublikamız ərazisində köhnə SSRİ bayrağını dalğalandırmaq cəsarətini özündə görən bu şəxs bu vəzifəyə necə gəlib.
Biz bu gün Qarabağ savaşından çıxmış, şəhid vermiş bir dövlətin vətəndaşlarıyıq. Gənclərimizin qanı torpağa SSRİ bayrağı dalğalansın deyə tökülməyib! Biz bu ölkədə rus bayrağına, SSRİ-nin qırmızı rəmzinə yox, üçrəngli bayrağımıza səcdə edirik. Və bu belə də qalacaq. Bu cür hadisələr təkcə bir kəndin problemi deyil. Bu, artıq ideoloji boşluqdan xəbər verir.
Qələbə bizimdi. Amma yalnız bizim simvollarımızla!
Ayhan Ağarzayev
20:38 13.05.2025
Oxunuş sayı: 974
