Yəməndə atəşkəs: ABŞ Prezidenti Donald Tramp hücumların dayandırıldığını elan etdi
Donald Tramp, Yəməndəki İran tərəfindən dəstəklənən husilərin artıq döyüşmək istəmədiklərini və Qırmızı dənizdəki gəmilərə hücumlara son qoyacaqlarını bildirdiklərini deyib. Prezident bununla bağlı təxminən iki aydır davam edən hava zərbələrinin dayandırılması barədə göstəriş verdiyini açıqlayıb.
Crossmedia.az xarici mediaya istinadən bildirir ki, Tramp bu bəyanatı Kanada Baş naziri Mark Karni ilə Ağ Evdə görüşü zamanı verib. O bildirib ki, “husilərə qarşı bombardmanı dərhal dayandıracağıq”. Tramp əlavə edib ki, husilər təslim olduqlarını bildiriblər və bundan da vacibi, gəmiləri partlatmamaq barədə verdikləri vədə əməl edəcəklərini deyiblər. Onun sözlərinə görə, ABŞ-ın məqsədi də məhz bu idi.
Umman Xarici İşlər naziri Bədr əl-Busaidi sosial platformada verdiyi açıqlamada, ABŞ-ın hava əməliyyatlarının sona çatdığını təsdiqləyib və Vaşinqtonla Muskatın, eləcə də Yəməndəki vasitəçilərin iştirakı ilə aparılan danışıqlar nəticəsində tərəflər arasında atəşkəs razılaşması əldə olunduğunu bildirib. Nazir qeyd edib ki, gələcəkdə tərəflər bir-birinin gəmilərinə, o cümlədən ABŞ gəmilərinə hücum etməyəcək, bununla da beynəlxalq ticarət və naviqasiya azadlığı təmin olunacaq.
Husilər isə verdikləri bəyanatda Qəzza ilə bağlı mövqelərinin dəyişmədiyini və ABŞ-la əldə olunan ilkin razılaşmanın Fələstinlilərə dəstəklərini zəiflətməyəcəyini bildiriblər. Lakin onların bu razılaşmaya tam razılıq verib-vermədikləri bəyanatda aydın göstərilməyib. Qeyd olunur ki, husilər Qəzza müharibəsinin başlamasından sonra İsraillə əlaqəli olduqlarını düşündükləri gəmilərə qarşı hücumlara başlayıblar.
ABŞ-ın Yəməndə mart ayında başlatdığı hava hücumları nəticəsində minə yaxın hədəfə iki minə qədər raket atıldığı, bu hücumların maliyyətinin isə 750 milyon dolları keçdiyi açıqlanıb. Bununla yanaşı, hücumlar zamanı ABŞ-a məxsus bir neçə pilotsuz uçuş aparatı və hərbi texnika məhv edilib. Husilər tərəfindən 100-dən çox ticarət gəmisinə hücum olunub, bunlardan ikisi batırılıb və dörd dənizçi həyatını itirib. Bu vəziyyət, Qırmızı dənizdəki ticarət axınını demək olar ki, yarıbayarı azaldıb.
Tramp, əldə edilən razılaşmanın Qırmızı dənizi yenidən təhlükəsiz ticarət marşrutu halına gətirəcəyini bildirib. Lakin bəzi analitiklər husilərin artıq dekabrdan bəri heç bir kommersiya gəmisinə hücum etmədiyini və ehtimal ki, İsrailə hücumlarını davam etdirəcəklərini qeyd ediblər.
Fatimə Nəbiyeva
13:50 07.05.2025
Oxunuş sayı: 937
