Bayden: Trampın Ukraynaya təzyiqi Putinə güzəşt deməkdir
ABŞ-ın keçmiş prezidenti Cozef Bayden Donald Tramp administrasiyasının Ukraynaya torpaqdan imtina etməsi üçün təzyiq göstərməsini “müasir dövrün güzəşt siyasəti” adlandırıb.
Crossmedia.az xarici mediaya istinadən bildirir ki, Bayden, Delaver ştatında çıxışı zamanı bildirib ki, Rusiya prezidenti Vladimir Putin Ukraynanı Rusiyanın bir hissəsi hesab edir və “əgər kimsə düşünürsə ki, ona müəyyən ərazilər verilsə, o, dayanar – bu sadəcə axmaqlıqdır”. Bayden hesab edir ki, əgər Tramp hakimiyyətdə qalarsa, ABŞ ilə Avropa arasındakı münasibətlər ciddi şəkildə zədələnəcək və bu da “müasir dünyanın siyasi tarixini dəyişəcək”.
Bayden həmçinin 2024-cü il prezident seçkilərində namizədliyini geri çəkməsinə də toxunub. Debatlardakı zəif çıxışından sonra partiya daxilində yaranan böhrana görə bu qərarı verdiyini bildirib və əlavə edib ki, “getmək çətin idi, amma doğru qərar idi”.
Bayden Tramp administrasiyasının Kanada, Panama kanalı və Qrenlandiya ilə bağlı bəzi fikirlərini də sərt tənqid edib. “Bu ölkə belə deyil. Biz azadlıq, demokratiya və imkanlar üçün varıq, yoxsa zorla nəsə almaq üçün yox”, – deyə o qeyd edib.
Ukrayna məsələsinə toxunan Bayden bildirib ki, Tramp və onun komandası Ukraynanın bir hissəsinin Rusiyaya verilməsi qarşılığında sülh planı üzərində işləyir. ABŞ-ın vitse-prezidenti Cey-Di Vens də bu fikirləri dəstəkləyərək, münaqişənin dayandırılması üçün hər iki tərəfin müəyyən ərazilərdən imtina etməli olduğunu deyib. Müdafiə naziri Pit Hegset isə Ukraynanın 2014-cü ildən əvvəlki sərhədlərinə qayıtmasının “real olmadığını” söyləyib.
Bayden isə bu yanaşmanı “müasir güzəşt siyasəti” adlandırıb və keçmişdə Böyük Britaniyanın nasist Almaniyasına göstərdiyi uğursuz güzəştlə müqayisə edib. O, həmçinin bəzi Avropa ölkələrinin ABŞ-ın dəstəyinə olan inamını itirməkdən narahat olduğunu qeyd edib.
Tramp son çıxışlarında Krımı Rusiyanın bir hissəsi kimi tanımağa hazır olduğunu demiş və Ukrayna prezidenti Zelenskini sülh danışıqlarına zərər vurmaqda ittiham etmişdi. Bayden isə bu fikirlərə sərt cavab verərək bildirib: “Əgər biz bir diktatorun başqa ölkənin torpaqlarını istədiyi kimi götürməsinə icazə verəriksə, o, bununla kifayətlənməyəcək. Bunu anlamıram.”
Bayden həmçinin bəzi NATO ölkələrinin Rusiyaya güzəşt etməyə meylli ola biləcəyindən ehtiyatlandığını deyib və əlavə edib ki, Trampın ABŞ-ın tərəfdaşlarına qarşı sərgilədiyi münasibət “Amerikaya yaraşmır”.
ABŞ Ukraynaya ən çox dəstək verən ölkə olsa da, Baydenin fikrincə, Tramp administrasiyası müttəfiqlərin əhəmiyyətini kifayət qədər anlamır: “Müttəfiqlərlə birlikdə olmaq gücdür, bu, həm də bizə xərcləri azaltmağa kömək edir.”
Sonda Bayden Trampın ikinci prezidentlik müddətində həyata keçirdiyi siyasəti tənqid edərək, “mən tarixin bu dövrü necə qiymətləndirəcəyini bilmirəm, amma heç bir parlaq nəticə görmürəm”, – deyə bildirib.
Fatimə Nəbiyeva
13:42 07.05.2025
Oxunuş sayı: 1013
