Azərbaycan- Belarus hərbi əməkdaşlığı genişlənir- ŞƏRH
Bakıda səfərdə olan Belarusun Baş naziri Aleksandr Turçinin rəhbərlik etdiyi nümayəndə heyətinin tərkibində olan Dövlət Hərbi Sənaye Komitəsinin sədri Dmitri Pantus bildirib ki, yaxın gələcəkdə Azərbaycanla birgə hərbi sənaye məhsulları istehsal olunacaq.
"Belarus və Azərbaycan arasında hərbi-texniki əməkdaşlıq strateji xarakter daşıyır və uzun tarixi ilə məşhurdur, ona görə də biz planlı və sistemli şəkildə işi davam etdiririk", - D.Pantus qeyd edib.
Onun sözlərinə görə, hazırda tərəflər Azərbaycan ərazisində hərbi təyinatlı məhsulların istehsalının təşkili üzrə birgə layihələri müzakirə edirlər.
İkitərəfli hərbi əməkdaşlıq perspektivləri barədə Crossmedia.az-a danışan hərbi ekspert Şair Ramaldanov bildirib ki, Azərbaycan hərbi müdafiə sənayesi baxımından inkişaf etmiş hərbi-sənaye kompleksləri ilə əməkdaşlıq üçün açıqdır: " Bu əməkdaşlıq artıq biristiqamətli deyil. Bu gün təkcə Azərbaycan tərəfi deyil, digər ölkələr, o cümlədən Belarus da birgə istehsal və əməkdaşlıq üçün bizə müraciət edir. Bu, ölkəmizin müdafiə sənayesinin texnoloji baxımdan cəlbedici və inkişaf etmiş struktura malik olması ilə bağlıdır. Hazırda Azərbaycanın müdafiə sənayesində istifadə olunan bütün istehsal avadanlıqları demək olar ki, müasir tələblərə cavab verir və bu da yüksək keyfiyyətli, dövrün standartlarına uyğun məhsulların istehsalına imkan yaradır. Digər tərəfdən, Azərbaycanın müdafiə sənayesi sahəsində çalışan kadr potensialı da kifayət qədər güclüdür. Bu sahədə ixtisaslaşmış mütəxəssislər texniki universitetlərdə bakalavr səviyyəsində hazırlanır. Eyni zamanda, ölkə xaricində – inkişaf etmiş hərbi-sənaye komplekslərinə malik dövlətlərdə – əlavə bilik və təcrübə qazanmaq məqsədilə kurslara və təcrübə proqramlarına göndərilirlər. Bu isə həm təcrübə mübadiləsinə, həm də yerli kadrlarda bilik və bacarıqların artırılmasına səbəb olur".
Hərbi ekspert Belarusla əməkdaşlığın isə daha çox rəqəmsal istehsal və pilotsuz uçuş aparatları sahəsində ola biləcəyini söyləyib: " Müasir dövr pilotsuz uçuş aparatlarının dövrüdür və dünyanın bir çox hərbi-sənaye kompleksləri bu sahədə aktiv işləyir. Hətta Rusiya da Ukrayna müharibəsi fonunda bu sahədə problemlər yaşadığı üçün İrana müraciət etmişdi. Əgər Belarus bu sahədə yetərincə inkişaf etmiş olsaydı, bəlkə də, Rusiya bu texnologiyanı məhz oradan alardı. Bu, onu göstərir ki, Belarus bu sahədə inkişaf etmək istəyir və Azərbaycanla əməkdaşlıqda maraqlı ola bilər. Bu istiqamətdə birgə istehsal üçün danışıqların aparılacağını ehtimal edirəm. Bundan əlavə, Azərbaycanın hava hücumundan müdafiə sistemlərinin son yenilənməsində Belarus mütəxəssislərinin də iştirak etdiyi məlumdur. Bu sahədə də qarşılıqlı əməkdaşlıq üçün addımlar atıla bilər".
"Hərbi sənaye ilə bağlı məsələlər çox zaman məxfi xarakter daşıyır və konkret hansı sahələrdə birgə istehsalın həyata keçiriləcəyi barədə məlumatlar məhdud şəkildə paylaşılır. Lakin Azərbaycan ilə Belarus arasındakı münasibətlər və dostluq əlaqələri, Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyev və Belarus Respublikasının Prezidenti arasındakı qarşılıqlı hörmət və əməkdaşlıq bu istiqamətdə imkanları genişləndirir.
Belarus hər zaman Azərbaycanın haqlı mövqeyini dəstəkləmişdir. Prezident İlham Əliyevin də vurğuladığı kimi, Vətən müharibəsində Azərbaycanın kimlərlə həqiqi dost olduğunu gördük və Belarus bu dost ölkələr sırasında yer aldı",-deyə o, qeyd edib.
Sonda Ş.Ramaldanov bildirib ki, hazırda Belarusdan Azərbaycana raket yayım vasitələri, digər raket sistemləri, hava hücumundan müdafiə qurğuları, zirehli texnikalar daxil olmaqla geniş spektrli hərbi texnika alınır və bu sahədə əməkdaşlıq getdikcə genişlənir: “Düşünürəm ki, bütün bunlar Azərbaycanın müdafiə sənayesi ilə Belarusun hərbi-sənaye kompleksləri arasında birgə fəaliyyət üçün böyük imkanlar yaradır. Bu əməkdaşlıq həm Azərbaycan, həm də Belarus üçün maraqlıdır və qeyd olunan istiqamətlər üzrə əlaqələrin gələcəkdə daha da inkişaf etdirilməsi istisna deyil”.
Pərvin Hacıyeva
18:55 06.05.2025
Oxunuş sayı: 15882
