Hindistan və Pakistan sərhədində gərginlik artır
Hindistan Hərbi Hava Qüvvələri Pakistanla sərhəddə yüksək döyüş hazırlığı vəziyyətinə gətirilib. Radcastan və Pəncab ştatlarında yerləşən ön cəbhə bazalarında döyüş təyyarələrinin ekipajları tam silahlanmış vəziyyətdə dərhal havaya qalxmağa hazır saxlanılır.
Bildirilib ki, döyüş tapşırıqlarına “hava-yer” tipli Scalp qanadlı raketləri ilə təchiz olunmuş çoxməqsədli Rafale qırıcıları da cəlb oluna bilər. Bu raketlərin uçuş məsafəsi 300 kilometrdən çoxdur və onlar strateji hədəfləri dəqiq vurmaq qabiliyyətinə malikdir
Crossmedia.az xarici mediaya istinadən bildirir ki, bu arada Pakistan bazar ertəsi “Fatah” seriyasından olan, 120 kilometr uçuş məsafəsinə malik “yer-yer” tipli raketin uğurlu təlim atışını həyata keçirib. Dawn qəzetinin yazdığına görə, raket sınağı ordunun döyüş hazırlığını yoxlamaq və silahın qabaqcıl naviqasiya sistemi ilə artırılmış dəqiqliyini qiymətləndirmək məqsədi daşıyıb.
Hazırda tərəflər arasında vəziyyət gərgin olaraq qalır. Rəsmi mənbələrdən məsələyə dair əlavə açıqlama verilməyib.
Fatimə Nəbiyeva
18:13 05.05.2025
Oxunuş sayı: 728
