Putindən nüvə siqnalı: “Ümid edirəm, istifadə etməyə ehtiyac olmaz”
Rusiya Prezidenti Vladimir Putin Ukrayna ilə müharibə barədə danışaraq, indiyə qədər nüvə silahı istifadə etməyə ehtiyac duyulmadığını və gələcəkdə də buna gərək qalmayacağını ümid etdiyini bildirib.
Crossmedia.az xarici mediaya istinadən xəbər verir ki, Rusiya dövlət televiziyasında yayımlanacaq müsahibəsinin bir hissəsi Telegram vasitəsilə ictimaiyyətlə paylaşılıb. Putin burada Rusiya ordusunun Ukraynadakı münaqişəni məntiqli bir sonluqla yekunlaşdırmaq üçün lazım olan gücə və vasitələrə sahib olduğunu vurğulayıb.
Nüvə silahları ilə bağlı suala cavabında Putin deyib: “Bu silahları istifadə etməyə ehtiyac olmadı və ümid edirəm ki, bundan sonra da olmayacaq”.
Putin 24 fevral 2022-ci ildə başlayan Rusiya-Ukrayna müharibəsinə toxunaraq əlavə edib: “2022-ci ildə başladığımız işi Rusiya üçün lazım olan nəticə ilə məntiqli şəkildə bitirə biləcək güc və vasitələrə sahibik”.
Digər tərəfdən, Ukrayna rəsmilərinin verdiyi məlumata görə, Rusiya qüvvələri gecə saatlarında Ukraynanın paytaxtı Kiyevə pilotsuz uçuş aparatları (İHA) ilə hücum edib. Hücum nəticəsində aralarında iki uşağın da olduğu 11 nəfər yaralanıb.
Bu hücum, Rusiya tərəfinin 8–10 may tarixlərini əhatə edəcək atəşkəs təklifi və Ukrayna Prezidenti Volodimir Zelenskinin bu çağırışı qəbul etməməsindən sonra baş verib. Zelenski sosial media platforması X-də yayımladığı açıqlamada, “Ruslar hər gün Ukraynanı vurarkən atəşkəs çağırışı edirlər”, deyə bildirib və əgər atəşkəs olacaqsa, bunun yalnız bayram günləri deyil, hər gün olmalı olduğunu vurğulayıb.
Kiyev komandanlığının rəhbəri Timur Tkaçenko isə İHA hücumuna dair açıqlamasında bildirib ki, məhv edilən dronların qalıqları Obolonski və Svyatoşinski rayonlarında yerləşən yaşayış binalarında yanğınlara səbəb olub.
Ukrayna Fövqəladə Hallar Xidmətinin məlumatına görə, şəhərdə baş verən yanğınların söndürülməsi üçün 76 yanğınsöndürən cəlb edilib.
Mədinə Cəlilova
15:36 04.05.2025
Oxunuş sayı: 626
