“Xeyir Xəbər” – müharibənin daxili səhnələri - Sumqayıtdan Bakıya uzanan uğur yolu
Mayın 3-də Sumqayıt Dövlət Dram Teatrının səhnəsində Əməkdar incəsənət xadimi Əli Əmirlinin “Xeyir xəbər” pyesi əsasında hazırlanan eyniadlı tamaşa növbəti dəfə nümayiş olunub. Səhnə əsərinin rejissoru istedadlı gənc rejisor Fuad Cavadzadə, səhnə tərtibatçısı Nizami Dadaşov, musiqi tərtibatçısı isə sənətşünaslıq üzrə fəlsəfə doktoru Telman Qəniyevdir.
Bu tamaşa, sözün əsl mənasında, yalnız səhnədə deyil, tamaşaçının ruhunda da bir müharibə təsviri yaradır. 44 günlük Vətən müharibəsinə həsr olunmuş əsərdə, ön cəbhədən daha çox, arxa cəbhədə yaşanan psixoloji zədələr, nigaran gözlər, ürəyə çökən səssiz dualar dilə gətirilir. Bir ailənin timsalında bütöv bir xalqın qələbəyə gedən yolundakı ağrılar və ümidlər tamaşa boyunca duyğuların şahə qalxmasına səbəb olur.
Rollarda səhnəyə çıxan Əməkdar artist Elmira Kərimova və aktyorlar Habil Xanlarov, Şəmistan Süleymanlı, Aynur Hümbətova, Elay Xasıyev, Siyavuş Mahmudov, Məryəm Hüseynli və Akif Mirzəyev obrazlara səmimi nəfəs verərək, həyatın içindən gələn bu hekayəni tamaşaçıya çatdırmağı bacarıblar.
Qeyd edək ki, bu dəfə “Xeyir xəbər” tamaşası Sumqayıtdan kənarda da nümayiş olunaraq daha geniş auditoriyaya təqdim edilib. “Bölgə Teatrlarının Bakı Premyeraları” layihəsi çərçivəsində Azərbaycan Dövlət Akademik Milli Dram Teatrında və Azərbaycan Dövlət Milli Gənc Tamaşaçılar Teatrında səhnələşdirilən tamaşa, 10 Mart – Milli Teatr Günündə Akademik Milli Dram Teatrında mükafata layiq görülüb.
Tamaşanın quruluşçu rejissoru Fuad Cavadzadə Türkiyədə aldığı peşəkar təhsil və müəllifi olduğu müxtəlif məqalələrlə yanaşı, uğurlu səhnə işləri ilə də teatr ictimaiyyətinin diqqətindədir. Onun sənətə sadiq və yaradıcı yanaşması, “Xeyir xəbər” kimi dərin emosional qatlara malik əsərlərlə öz təsdiqini tapmaqdadır.
Sonda deyə bilərik ki, “Xeyir xəbər” təkcə səhnə əsəri deyil – bu, Azərbaycan teatrının vətənpərvərlik ruhunu yaşadan, tamaşaçının yaddaşına həkk olunan sənət nümunəsidir.
Ayan Sədi
10:28 04.05.2025
Oxunuş sayı: 562
