Qazaxıstan ilk dəfə olaraq Mərakeşə taxıl ixrac etdi
Qazaxıstan Mərakeşə ilk dəfə olaraq taxıl partiyası göndərib. Bu barədə ölkənin milli dəmir yolu şirkəti “Qazaxıstan Temir Joly” məlumat yayıb. Bildirilib ki, taxıl şimal bölgələrində istehsal olunub və uzun məsafə qət edərək Afrikaya çatdırılacaq.
Crossmedia.az xarici mediaya istinadən bildirir ki, 105 taxılvaqonu Jaña-Yesil və Sarıköl stansiyalarından yola salınıb. Qatarlar Latviya ərazisindən keçərək Liyepaya limanına çatacaq. Burada isə taxıl dəniz gəmilərinə yüklənəcək və Mərakeş istiqamətində yola düşəcək.
Mərakeşə ümumilikdə 60 min ton taxıl göndərilməsi nəzərdə tutulur. Bu həcmdə məhsul 17 ayrı qatar tərkibi ilə daşınacaq. Bütün taxıl şimal bölgəsindəki təsərrüfatlarda yetişdirilib.
Qazaxıstan rəsmiləri hesab edirlər ki, bu ixrac ölkənin xarici bazarlarda mövqeyinin möhkəmlənməsinə xidmət edəcək. Həmçinin Afrika ölkələri ilə iqtisadi əməkdaşlıq üçün yeni imkanlar yaradacaq.
Qeyd edək ki, Qazaxıstan dünyanın ən iri taxıl istehsalçılarından biridir. Son illərdə ölkə məhsul ixracını diversifikasiya etməyə və yeni bazarlara çıxmağa çalışır.
Fatimə Nəbiyeva
16:50 01.05.2025
Oxunuş sayı: 765
