İsraildə güclü meşə yanğınları: Alov qeyri-qanuni yəhudi məskənlərinə qədər çatdı
İsraildə son günlərdə müşahidə olunan güclü küləklər nəticəsində meşəlik ərazilərdə baş qaldıran yanğınlar sürətlə yayılaraq geniş sahələri əhatə edib. Yerli rəsmilərin verdiyi açıqlamaya görə, yanğın artıq qeyri-qanuni yəhudi məskənləri və bəzi fermalara qədər çatıb. Alovun sürətlə yaşayış məntəqələrinə yaxınlaşması ərazidə ciddi təhlükə yaradıb.
Crossmedia.az xarici mediaya istinadən bildirir ki, İsrailin Yanğınsöndürmə Xidməti bu yanğının ölkə tarixində qeydə alınan ən genişmiqyaslı yanğınlardan biri olduğunu bildirib. Rəsmi məlumatlara görə, yanğın nəticəsində indiyədək 12 minə yaxın dunam (təxminən 1 200 hektar) ərazi yanıb. Küləyin istiqamətinin dəyişməsi isə alovun daha geniş sahələrə yayılmasına səbəb olub.
İsrail rəsmiləri təhlükə altında olan bölgələrdə yaşayan əhalinin təxliyə olunduğunu açıqlayıb. Yanğının qarşısının alınması üçün bölgəyə onlarla yanğınsöndürən briqada və helikopter cəlb olunub. Müdafiə qüvvələri də əməliyyata dəstək verir.
Hazırda yanğının dəqiq səbəbi müəyyən olunmasa da, təbii faktorların – xüsusilə də havanın quru və küləkli olması – yanğının genişlənməsində əsas rol oynadığı vurğulanır. Ekspertlər qeyd edir ki, bu cür şiddətli yanğınlar həm ekologiyaya, həm də insanların sağlamlığına ciddi zərər vurur.
İsrail hökuməti və fövqəladə hallar xidməti əhalini ehtiyatlı olmağa çağırıb. Vətəndaşlardan açıq havada odla davranışa qarşı diqqətli olmaları, təhlükəli zonalara yaxınlaşmamaları istənilib. Hazırda vəziyyət nəzarət altına alınmağa çalışılır, lakin hava şəraiti işləri xeyli çətinləşdirir.
Qeyd edək ki, yanğınla üz-üzə qalan qeyri-qanuni yəhudi məskənləri beynəlxalq hüquqa zidd olaraq inşa edildiyindən, bu ərazilərdəki vəziyyət eyni zamanda siyasi müzakirələrin də gündəminə çevrilib.
Fatimə Nəbiyeva
15:10 01.05.2025
Oxunuş sayı: 741
