Ərdoğan və Tramp arasında görüş planlaşdırılır: İki ölkə münasibətlərində yeni mərhələ gözlənilir
Türkiyə Prezidenti Rəcəb Tayyib Ərdoğan ABŞ-ın Prezidenti Donald Trampla mümkün görüş barədə danışaraq, bu görüşün Ankara ilə Vaşinqton arasında gələcək münasibətlərə yön verəcəyini bildirib. O, bu barədə Anadolu Agentliyinə verdiyi açıqlamada deyib ki, Türkiyə və ABŞ-ın müvafiq dövlət qurumları qarşıdakı görüşün təşkili üzərində fəal şəkildə işləyir.
Crossmedia.az xarici mediaya istinadən bildirir ki, Prezident Ərdoğan Tramp ilə ilk fürsətdə üzbəüz görüş keçirməyə hazır olduğunu və tərəflər arasında indiyədək baş tutmuş telefon danışıqalrının səmimi, açıq və məhsuldar xarakter daşıdığını vurğulayıb. “Türkiyə və ABŞ arasında münasibətlər sadəcə bu günlə məhdudlaşmır, bizim aramızda dərin və möhkəm tarixi bağlar mövcuddur. Bu səbəbdən müzakirə olunmalı çoxlu məsələlər var və birlikdə atılası addımlar bizi gözləyir,” – deyə Ərdoğan bildirib.
Türkiyə Prezidenti onu da əlavə edib ki, planlaşdırılan görüş iki ölkə arasında əməkdaşlığın gələcək istiqamətini müəyyən edə bilər. “Nazirliklərimiz bu görüşün təşkili, gündəliyin müəyyənləşdirilməsi və tarixin dəqiqləşdirilməsi üzərində işləyir. Biz, liderlər səviyyəsində birbaşa təmasın iki ölkə üçün faydalı olacağına inanırıq,” – deyə o bildirib.
Ərdoğan, həmçinin Tramp ilə Suriya məsələsində ortaq baxışların mövcud olduğunu deyib. “Bu məsələdə bir-birimizi yaxşı anlayırıq. Əlbəttə, fərqli baxışların olduğu sahələr də var. Lakin biz, həmin sahələrdə də məntiqli və ədalətli kompromis axtaracağıq. Biz, dialoq və diplomatiya ilə həll yolları tapmağın mümkün olduğuna inanan iki liderik,” – deyə Prezident qeyd edib.
Ərdoğanın bu açıqlamaları ABŞ-la münasibətlərdə mümkün yumşalmaya və strateji əməkdaşlığın yeni mərhələyə keçə biləcəyinə işarə kimi qiymətləndirilir. Donald Trampın yenidən ABŞ siyasətində aktiv rol almağa başlaması da bu görüşə beynəlxalq diqqəti artırır. Görüşün baş tutacağı tarix və yer isə hələlik açıqlanmayıb.
Fatimə Nəbiyeva
20:14 30.04.2025
Oxunuş sayı: 1027
