O, daim Ulu Öndər Heydər Əliyevə mənəvi dayaq olub - AÇIQLAMA
Aprelin 15-i dünya şöhrətli alim, tibb elmləri doktoru, professor, Əməkdar elm xadimi, akademik Zərifə Əliyevanın anım günüdür. O, 1923-cü il aprelin 28-də Naxçıvanın Şahtaxtı kəndində, görkəmli dövlət xadimi Əziz Əliyevin ailəsində dünyaya göz açıb. Zərifə xanım bütün həyatını insanların sağlamlığına və rifahına xidmətə həsr edib. O, tibb elminin inkişafına əvəzsiz töhfələr vermiş, xüsusən oftalmologiya sahəsindəki yüksək biliyi və insanlara bəslədiyi dərin məhəbbəti ilə yalnız bir alim kimi deyil, həm də qayğıkeş və unudulmaz bir şəxsiyyət kimi daimi yaddaşlara həkk olunmuşdur.
Mövzu ilə bağlı Crossmedia.az-a açıqlama verən deputat Könül Nurullayeva ilk olaraq bildirib ki, Azərbaycan oftalmologiyasını dünya səviyyəsində tanıdan akademik Zərifə xanım Əliyeva təbabətdə öz dəst-xətti olan novator alim idi: “O, özündə Azərbaycan ziyalısının ən gözəl nümunəsini təcəssüm etdirirdi. Zərifə xanım Əliyeva səhiyyədə kadr hazırlığına və həkimlərin ixtisasının təkmilləşdirilməsinə gərgin əmək sərf edib. Alimin birbaşa rəhbərliyi altında gənc alimlərin və həkim-oftalmoloqların böyük bir nəsli yetişib. Zərifə xanım tələbələrinə zəngin həyat təcrübəsini öyrədib, onlara diqqət və qayğı ilə yanaşıb. 150-yə yaxın elmi əsərin, 12 monoqrafiyanın, dərslik və dərs vəsaitlərinin, 1 ixtira, 12 səmərələşdirici təklifin müəllifi və həmmüəllifi olan Zərifə xanım onlarla elmlər doktoru və fəlsəfə doktorunun elmi rəhbəri və məsləhətçisi olub. Zərifə xanım Əliyevanın alim kimi qazandığı böyük uğurlar Azərbaycan tibb elminin tarixində xüsusi mərhələ hesab olunur”.
Deputatın sözlərinə görə, onu yaxından tanıyan hər kəs deyir ki, Zərifə xanımın həkim kimi fədakarlığı, yüksək vətəndaşlıq məsuliyyəti, səmimiliyi və qayğıkeşliyi, insanlara və onların problemlərinə göstərdiyi diqqət ona həmkarlarının, yetirmələrinin və xəstələrinin dərin hörmətini qazandırıb: “Həmkarları alimin yüksək insani keyfiyyətlərə malik olduğunu vurğulayırlar. Akademik Zərifə xanım Əliyeva dəyərli Azərbaycan xanımı, ziyalı kimi gənc qadınlarımız üçün də nümunədir. Onun apardığı tədqiqat işləri, çoxsaylı elmi əsərlər, monoqrafiya və kitablar hazırda da oftalmoloq həkimlər, tələbələr tərəfindən geniş istifadə olunur. O, elmi-pedaqoji fəaliyyətində təkcə çoxşaxəli elmi-tədqiqat işləri aparmaqla kifayətlənməmiş, yüksəkixtisaslı gənc alim kadrların yetişdirilməsinə və oftalmoloq-həkimlərin ixtisaslarının artırılması işinə də xüsusi diqqət yetirib. Akademik Zərifə Əliyevanın tədqiqatları, alim kimi qazandığı böyük uğurlar Azərbaycan tibb elminin tarixində xüsusi mərhələ təşkil edir. Dünya tibb elminə əvəzolunmaz töhfələr vermiş oftalmoloq alim Zərifə xanım Əliyeva hər kəsin yaddaşında yüksək vətəndaşlıq, humanizm mücəssəməsi kimi əbədi yaşayır”.
Elmi fəaliyyəti ilə yanaşı Zərifə xanım eyni zamanda qayğıkeş ana, vəfalı ömür-gün yoldaşı idi.
“O, daim Ulu Öndər Heydər Əliyevə mənəvi dayaq olub. Ümumilli lider deyirdi: “Zərifə xanım kimi həyat yoldaşım olduğuna və o, ailəmdə çox yüksək mənəvi mühit yaratdığına görə mən xoşbəxt olmuşam”. Prezident İlham Əliyev isə Zərifə xanım haqqında belə söyləyir: “Mənim anam əsl alim idi. O, tibbin bütün incəliklərini öyrənməyə səy göstərirdi. Bizi Azərbaycanın layiqli vətəndaşları kimi tərbiyə etməyə, böyütməyə vaxt tapırdı”. Zərifə xanım həm də Azərbaycanın ərazi bütövlüyü və suverenliyini bərpa edən Müzəffər Ali Baş Komandan İlham Əliyevi yetişdirən ana kimi, dəyərli Azərbaycan qadını kimi qəlbimizdə daim yaşayacaq. Anım günündə Zərifə xanım Əliyevanın əziz xatirəsini dərin ehtiram hissi ilə anırıq”,- deyə K.Nurullayeva fikrini yekunlaşdırıb.
Nəzrin Salmanova
14:57 15.04.2025
Oxunuş sayı: 3685
