Sidneydə Türk Mədəniyyət Festivalı böyük maraqla qarşılanıb
Sidneydə hər il Auburn ərazisində təşkil edilən Türk Mədəniyyət Festivalına maraq bu il də əvvəlki illərdə olduğu kimi yüksək olub.
Crossmedia.az xəbər verir ki, aprel ayının ilk həftəsində keçirilən festival cümə gününə təsadüf edib.
Bu səbəbdən, Cumberland Bələdiyyəsindən xüsusi icazə alınıb və Gelibolu məscidinin din xadimi Abdülhalim Erkoç minarəndən azan səsləndirib.
Azan səsi Sidneyin bir çox ərazisində yüksək tonla eşidilib. Festivalda kitablar, gravürlər, hüsnü-xətlər, orijinal rəsmlər, ənənəvi əl işləri, cizgi və çap rəsmlər, yerli türk mətbəxinin zəngin ləzzətləri, türk qəhvəsi, türk simidi və türk lokumu, geyim, zərgərlik və aksesuarlar, ebru, İslam kaligrafiyası, tematik oyun meydançaları kimi fəaliyyətlər təqdim edilib.
Tədbir iştirakçıları müxtəlif millətlərdən olan insanlar türk mədəniyyəti ilə, yerli türk məhsulları ilə yaxından tanış olmaq imkanı əldə edib.
Festival ərazisində jurnalistlərin suallarını cavablandıran Sidney Gelibolu Məscidinin din xadimi Abdülhalim Erkoç bildirib ki, tədbir gözləniləndən daha çox iştirakçı ilə gerçəkləşib:
“Festivalımız xarici millətlərin yalnız türk mədəniyyətini deyil, İslam mədəniyyətini də yaxından tanımasına vasitə olub. Avstraliya vətəndaşları türk yeməklərini çox dadlı tapırlar. Türk dilini də qulağa ahəngdar və fərqli gələn bir dil kimi qəbul edirlər. Bu festival ilə mədəniyyət ənənələrimizi və adət-ənənələrimizi Avstraliya vətəndaşlarına tanıtmaq imkanını əldə etdik. Ən çox sevdikləri məhsulun Türk lokumu olduğunu söyləyə bilərəm. Avstraliyalılar mədəniyyətimizə heyrandır. Anzakların Çanaqqala müharibəsi və sonrakı inkişafları tarixi sənədlərdən bilirik. Bu müharibədən dostluq yaranıb. Bu inkişafların nəticəsində Avstraliya ilə Türkiyə arasında dostluq körpüləri qurulub. Avstraliya tərəfindən hər il mart ayında Çanaqqalaya ziyarətlər həyata keçirilir. Hazırda Avstraliya ilə çox güclü əlaqələrimiz var. Qarşılıqlı münasibətlərimiz bu kimi festivallarla daha da inkişaf edir. Bağlarımız hazırda möhkəm təməl üzərindədir. BMT-nin dəstəyi ilə nəşr olunan 2024 Dünya Ölkələri Xoşbəxtlik İndeksində 10-cu sırada yer alan Avstraliyada hər millətdən vətəndaş mövcuddur. Yapon, çin, italyan, alman, rus, ingilis, irlandiyalı, koreyalı, sinqapurlu, indoneziyalı, əfqanıstanlı, malayziyalı kimi onlarla millətdən insan eyni universitetdə oxuyur, eyni iş yerində çalışırlar. İstər-istəməz türk mədəniyyəti ilə tanış olurlar. Tanışlıqlar mədəniyyətimiz haqqında dərin bir bilgi sahibi olmalarını təmin edir. Yerli məhsullarımızdan, türk restoranlarından məlumatlı olurlar. Festivallarla bütün mədəniyyətimiz haqqında məlumat sahibi olurlar. Müsəlman olmamız səbəbilə türk-islam Mədəniyyətindən də xəbərdar olurlar”.
Qeyd edək ki, festival 2 gün davam edib və rəngarəng nümayişlərlə sona çatıb.
Nəzrin Salmanova
11:45 09.04.2025
Oxunuş sayı: 8035
