Qadınlar sükan arxasında: Nəqliyyat sektorunda yeni mərhələ başlayır- Müsahibə
Azərbaycanda qadınların ənənəvi olaraq kişilərlə əlaqələndirilən sahələrdə, xüsusilə də nəqliyyat sektorunda fəallığı artmaqdadır. Rəqəmsal İnkişaf və Nəqliyyat Nazirliyi yanında AYNA-nın məlumatına görə, indiyədək 169 qadın taksi sürücüsü olmaq üçün imtahanları uğurla keçərək şəhadətnamə alıb. Onlardan 111-i artıq fəaliyyət göstərir. Ən gənc qadın sürücünün 23, ən yaşlının isə 71 yaşı var. Yaxın zamanda ilk qadın avtobus sürücülərinin də fəaliyyətə başlaması gözlənilir. Bu proses qadınların ictimai nəqliyyatda iştirakını artırmaq və gender bərabərliyini gücləndirmək baxımından əhəmiyyətli addım kimi qiymətləndirilir.
Sürücülər arasında qadınların artmasına münasibət birmənalə deyil. Bəzilərk zərif cins nümayəndələrinin daha yaxşı sürücü olduqlarını iddia etdikləri halda, digərləri bu fikrə qəti etiraz edirlər.
Nəqliyyat eksperti Eldəniz Cəfərov qadın sürücülərinin artması ilə bağlı Crossmedia.az-a mövzu ilə bağlı fikirlərini bölüşüb.
– Azərbaycanda qadınların taksi sürücüsü kimi fəaliyyətə başlaması nəqliyyat sahəsində hansı dəyişikliklərin göstəricisidir?
- Son illər ərzində Azərbaycanda nəqliyyat infrastrukturu dəyişir. Sistem getdikcə rəqəmsallaşır, daha çevik və optimallaşdırılmış hala gəlir. Bu dəyişikliklər qadınların da sektorda aktiv iştirakına şərait yaradır.
– Qadınların nəqliyyat sektoruna marağının artmasının əsas səbəbləri nələrdir?
- Bu sahəyə maraq təbii olaraq böyükdür, çünki avtonəqliyyat sektoru iqtisadiyyatın aparıcı istiqamətlərindən biridir. Ona görə də qadınların sürücü kimi fəaliyyət göstərməsi tamamilə normal bir prosesdir.
– AYNA-nın qadın sürücülərin hazırlanması istiqamətində atdığı addımları necə qiymətləndirirsiniz?
- Qadın da, kişi də bərabər hüquqlara malikdir. Qadınların bu sahədə çalışmasına tamamilə normal baxıram və bunu müsbət hal hesab edirəm.
– Qadınların bu sahəyə gəlişi xidmət keyfiyyətinə təsir göstərə bilərmi?
- Taksi sürücüsü olmaq istəyənlər üçün xüsusi kursların təşkili çox vacibdir. Əvvəllər belə bir praktika mövcud deyildi. Lakin indi bu sistemin tətbiqi sektorda məsuliyyət və peşəkarlıq səviyyəsini artırır. Artıq təsadüfi şəxslərin ictimai nəqliyyatda fəaliyyət göstərməsi mümkün deyil.
– Qadınların psixoloji hazırlığı kifayət qədər yerindədirmi?
- Burada əsas məsələ cinsiyyət deyil, fərdi bacarıqlar və səhhətdir. Əgər qadın özündə bu gücü və bacarığı görürsə, onun sürücü kimi çalışması tamamilə normaldır. Buna təəccüblənmək lazım deyil.
– Qadın sürücüləri kişi sürücülərdən fərqləndirən əsas xüsusiyyət nədir?
- Qadın sürücülər daha səliqəlidirlər. Tarixən Azərbaycanda troleybus, avtobus və tramvay sürücüləri arasında qadınlar da olub. Hətta qadın pilotlarımız da var. Bu səbəbdən qadınların nəqliyyat sektorunda təmsil olunması nə yeni, nə də təəccüblü haldır.
Mehriban Yariyeva
20:05 25.10.2025
Oxunuş sayı: 1639
