Türkiyə Dəyanət Vəqfinin Baş direktoru Aİİ-də olub
Ölkəmizdə səfərdə olan Türkiyə Dəyanət Vəqfinin (TDV)Baş direktoru İzani Turan Azərbaycan İlahiyyat İnstitutunun (Aİİ) qonağı olub. Qonağın gəlişi münasibətilə Aİİ-də görüş təşkil olunub. GörüşdəTürkiyənin Azərbaycandakı Səfirliyinin dini işlər üzrə müşaviri İhsan Açık, ali təhsil müəssisəsinin rəhbərliyi, əməkdaşları və tələbələri iştirak ediblər.
Aİİ rektoru, dosent Aqil Şirinov açılış nitqi ilə çıxış edib,tədbir iştirakçılarına qonaq haqqında geniş məlumat verib. İnstitut rəhbəri İzani Turanı İnstitutda görməkdən məmnun olduğunu bildirib. A.Şirinov TDV-nin dünyanın müxtəlif ölkələrindəki fəaliyyətlərini təqdirəlayiq olduğunu diqqətə çatdırıb.
Türkiyənin Azərbaycandakı Səfirliyinin dini işlər üzrə müşaviri İhsan Açık çıxış edərək, Ramazan ayının başlanması münasibətilə təbriklərini bildirib. İ.Açık bildirib ki, Türkiyənin ilahiyyat sahəsində çalışan alimlərinin İlahiyyat fakültəsində tələbələrlə görüşünü yüksək qiymətləndirir, alimlərin öz bilik və tövsiyələrini gənclərlə paylaşmasının vacibliyini qeyd edir.
Daha sonra TDV-nin Baş direktoru İzani Turan çıxış edib. Məruzəçi elm yolunda rastlaşdığı çətinliklər, əsasını fiziki və mənəvi zəhmətin təşkil etdiyi tələbəlik illəri, eyni zamanda, həyat yolundan, bugünkü fəaliyyətindən danışıb.
İzani Turan TDV-nin fəaliyyətindən də bəhs edib. Vəqfin dünyanın 149 ölkəsində 1 003 şöbəsi və genişspektrli fəaliyyəti, eləcə də beynəlxalq yardım məsələsi ilə Türkiyədə əhəmiyyətli bir vətəndaş cəmiyyəti hərəkatına çevrildiyini nəzərə çatdırıb.
Ölkəmizin gün-gündən daha da çiçəkləndiyini qeyd edən İ.Turan bildirib ki, Azərbaycana səfərinin səbəbi mənəvi qardaşlıq bağlarımızın daha da möhkəmlənməsi, birlikdə daha böyük işlərə imza atmaqdır.
17:25 04.03.2025
Oxunuş sayı: 4502
