Almaniyalı siyasətçi: “Avropa NATO-nun müdafiəsi olmadan qalmağa hazır olmalıdır”
Almaniyada kanslerliyə əsas namizəd sayılan Fridrix Merz deyib ki, Avropa ABŞ-sız öz təhlükəsizliyini təmin etməyə hazırlaşmalıdır.
Crossmedia.az xəbər verir ki, o, bu barədə Almaniya KİV-inə müsahibəsində deyib.
“Biz Trampın NATO-nun qarşılıqlı müdafiə öhdəliyinə şərtsiz riayət etməyəcəyinə hazır olmalıyıq. Fikrimcə, avropalılar mümkün qədər böyük səylər göstərməlidirlər ki, heç olmasa Avropa qitəsini öz gücümüzlə müdafiə edə bilək”, - o söyləyib.
Merz, hazırda Almaniyada bazar günü keçiriləcək seçkilər ərəfəsində ictimai rəy sorğularında lider olan Xristian Demokrat İttifaqının (CDU) sədri olaraq bildirib ki, Avropa NATO-nun 5-ci maddəsinin – alyans üzvlərinin kollektiv müdafiə öhdəliyinin – Tramp administrasiyası tərəfindən yerinə yetirilməməsi ehtimalına qarşı birgə tədbirlər görməlidir.
Ondan Trampın bu maddəni yerinə yetirəcəyinə inanıb-inanmadığı soruşulduqda Merz belə cavab verib: “Mən heç vaxt bütün var-dövlətimi hər hansı suala qoymazdım və əlbəttə ki, bu məsələdə də risk etmərəm.”
Merz həmçinin Almaniyanın Fransa və Britaniyanın nüvə çətiri altına sığınması ehtimalına da toxunub. O, Fransa prezidenti Emmanuel Makronun Berlinə belə bir təklif etdiyini, lakin əvvəlki Almaniya hökumətlərinin bu məsələyə açıq şəkildə cavab vermədiyini qeyd edib.
“Biz həm Britaniya, həm də Fransa ilə – Avropanın iki nüvə gücü olan ölkələri ilə – dialoq aparmalıyıq ki, nüvə paylaşımı və ya heç olmasa Britaniya və Fransanın nüvə təhlükəsizlik təminatı bizim üçün də keçərli ola bilərmi?” – deyə Merz vurğulayıb.
Nabat Fərzəliyeva
15:44 23.02.2025
Oxunuş sayı: 3436
