Heyvandarlıq sahəsində fəaliyyət göstərən fermerlərə və sahibkarlara çağırış
Azərbaycan Respublikasının Qida Təhlükəsizliyi Agentliyi (AQTA) ölkədə qida təhlükəsizliyinin təmin edilməsi, heyvan mənşəli məhsulların izlənilmə sisteminin qurulması və əhalinin sağlam, təhlükəsiz ət və ət məhsulları ilə təmin olunması istiqamətində nəzarət və tənzimləmə tədbirlərini genişləndirir.
Crossmedia.az xəbər verir ki, qeyd edək ki, ölkə ərazisində mövcud olan bütün heyvanların identifikasiya olunması qida zəncirində şəffaflığın, heyvan xəstəliklərinə qarşı effektiv mübarizənin və məhsulların izlənilməsinin təmin edilməsi üçün mütləq şərtdir. Fermerlər və heyvandarlıqla məşğul olan sahibkarlar bu prosesdə maksimum məsuliyyətli olmalıdır. Heyvanların identifikasiyası epizootik sabitliyin qorunmasına, xəstəliklərin vaxtında qarşısının alınmasına və istehlaka təqdim olunan heyvan mənşəli məhsulların və xammalın mənşəyinin məlum olmasına zəmanət verir.
Bununla yanaşı, heyvanların kəsimi yalnız qanunvericiliyin tələblərinə cavab verən, müvafiq sanitar-gigiyenik şəraitə, soyutma sistemlərinə və baytarlıq nəzarətinə malik heyvan kəsimi məntəqələrində həyata keçirilməlidir. Küçələrdə, yol kənarlarında, antisanitar və müvafiq icazəsi olmayan yerlərdə heyvan kəsimi qətiyyən yolverilməzdir.
Eyni zamanda, heyvan kəsimi məntəqələri olmayan regionlarda yeni, baytarlıq nəzarətində olan kəsim məntəqələrinin qurulması mühüm prioritet hesab edilir. Bununla əlaqədar, Agentlik yerli icra nümayəndələrini və sahibkarları sıx əməkdaşlığa çağırır. Regionlarda sahibkarlar tərəfindən yeni, müasir kəsim məntəqələrinin formalaşdırılması, yerli icra orqanlarının isə bu prosesə zəruri təşkilati və infrastruktur dəstəyini göstərməsi bölgələrdə qanunsuz kəsim hallarının qarşısını alacaq.
AQTA qida zəncirində iştirak edən bütün tərəfləri qida təhlükəsizliyi tələblərinə ciddi əməl etməyə, məsuliyyət nümayiş etdirməyə və bu istiqamətdə həyata keçirilən islahatlara dəstək verməyə çağırır.
15:45 09.09.2026
Oxunuş sayı: 215
