Yunanıstanda qəzaya uğrayan qırıcının pilotları həlak olub
Yunanıstanda hava nümayişi zamanı F-4 Phantom tipli döyüş təyyarəsi qəzaya uğrayıb. Hadisə nəticəsində iki pilot həlak olub.
Crossmedia.az xarici mediaya istinadən xəbər verir ki, qəza Tanagra aviabazasında Afina Uçuş Həftəsi çərçivəsində keçirilən hava nümayişi zamanı baş verib.
Yunanıstan rəsmiləri təyyarənin iki pilotdan ibarət heyətinin həyatını itirdiyini açıqlayıb.
Məlumata görə, F-4 Phantom aviabazanın uçuş-enmə zolağından təxminən 2 kilometr məsafədə qəzaya uğrayıb. Hadisədən sonra başlayan yanğının söndürülməsinə 11 yanğınsöndürən təyyarə və helikopter cəlb olunub. Yanğının yaxınlıqdakı meşəlik əraziyə yayılmasının qarşısı alınıb.
Təyyarənin havaya qalxdıqdan təxminən üç dəqiqə sonra qəfil hündürlük itirməyə başladığını və yerə çırpıldığını bildirib. Qəzadan sonra tədbir dayandırılıb və ərazi təxliyə edilib.
Afina Uçuş Həftəsinin sentyabrın 5-i və 6-da Yunanıstan və xarici ölkələrin hərbi təyyarələrinin iştirakı ilə keçirilməsi planlaşdırılırdı.
21:40 05.09.2026
Oxunuş sayı: 264
