ABŞ İrana qarşı hərbi hücum əvəzinə iqtisadi təzyiqi gücləndirəcək
ABŞ administrasiyasının İranla bağlı strategiyasında hərbi əməliyyatlardan daha çox iqtisadi təzyiq və dəniz blokadasına üstünlük verməyi planlaşdırdığı iddia olunur.
Crossmedia.az xəbər verir ki, Anadolu Agentliyi bu barədə məlumat yayıb. “Axios”a danışan ABŞ rəsmilərinin sözlərinə görə, ABŞ dövlət katibi Marko Rubio son telefon danışıqları zamanı müttəfiq ölkələrin xarici işlər nazirlərinə Vaşinqtonun İranla bağlı hazırkı strategiyası barədə məlumat verib.
İddialara görə, Rubio ABŞ-ın “hazırkı mərhələdə” İrana qarşı yeni hava hücumları həyata keçirməyi planlaşdırmadığını bildirib. Bunun əvəzində Vaşinqtonun dəniz blokadası və ABŞ Maliyyə Nazirliyinin açıqladığı yeni sanksiyalar vasitəsilə Tehran üzərində iqtisadi təzyiqi artırmağa fokuslanacağı qeyd olunub.
ABŞ rəsmisi bildirib ki, Rubio tərəfdaşlarına yeni hərbi əməliyyatların planlaşdırılmadığını açıq şəkildə çatdırıb. Bununla belə, İranın ilk hücumu həyata keçirməsi halında ABŞ-ın hərbi cavab variantını gündəmdə saxlayacağı vurğulanıb.
Digər ABŞ rəsmisi isə ABŞ Hərbi Dəniz Qüvvələrinin Hörmüz boğazında minaların təmizlənməsini münaqişədə dönüş nöqtəsi kimi qiymətləndirib. Onun sözlərinə görə, bu addım İranın əsas təzyiq vasitələrindən birinin böyük ölçüdə təsirsizləşdirilməsinə səbəb olub.
Rəsmi həmçinin ABŞ-ın hərbi variantlar əvəzinə iqtisadi tədbirlərə üstünlük verməsinin ölkədə keçiriləcək aralıq seçkilərindən sonraya qədər davam edə biləcəyini iddia edib. Onun sözlərinə görə, bundan sonra İrana qarşı hərbi əməliyyat variantının yenidən gündəmə gətirilməsi mümkündür.
11:19 26.08.2026
Oxunuş sayı: 45
