Taksi sürücüləri ilə sərnişinlər niyə "müharibə" aparır?
Son dövrlər taksi sürücüləri ilə sərnişinlər arasında baş verən mübahisə və insidentlərin sayı nəzərəçarpacaq dərəcədə artıb. Sosial şəbəkələrdə yayılan görüntülər, qarşılıqlı ittihamlar və fiziki qarşıdurmalar cəmiyyətdə narahatlıq yaradır. Halbuki taksi sürücüləri fəaliyyətə başlamazdan əvvəl imtahan və seçmə mərhələlərindən keçirlər. Buna baxmayaraq, problemlərin davam etməsi bu mexanizmlərin effektivliyi ilə bağlı suallar doğurur. Mütəxəssislər hesab edirlər ki, məsələ yalnız sürücülərin peşə hazırlığı ilə məhdudlaşmır, burada insan faktoru, psixoloji gərginlik və qarşılıqlı davranış mədəniyyəti də mühüm rol oynayır.
Mövzu ilə bağlı Crossmedia.az-a açıqlama verən nəqliyyat eksperti Adil Nəbiyev bildirib ki, son dövrlər taksi sürücüləri ilə sərnişinlər arasında baş verən insidentlərin artmasının bir neçə əsas səbəbi var:
"İlk növbədə, tərəflər arasında qarşılıqlı hörmət və ünsiyyət mədəniyyətinin zəifləməsi diqqət çəkir. Bəzi hallarda sərnişinlər sürücülərdən qanunvericiliyə zidd tələblər irəli sürür, marşrutun dəyişdirilməsini, avtomobilin tutumundan artıq sərnişin daşınmasını və ya yol hərəkəti qaydalarının pozulmasını istəyirlər. Digər tərəfdən, bəzi sürücülər də kobud davranış, etik normalara əməl etməmək, sifarişi əsassız ləğv etmək və ya xidmət keyfiyyətini aşağı səviyyədə göstərməklə mübahisələrin yaranmasına səbəb olurlar. Uzun iş saatları, yol tıxacları, psixoloji gərginlik və gündəlik qazanc təzyiqi də bu qarşıdurmaları artıran amillərdəndir. Bundan əlavə, sosial şəbəkələrdə yayılan hər bir hadisə cəmiyyətdə belə insidentlərin daha çox baş verdiyi təəssüratını yaradır”.
Ekspert qeyd edib ki, sürücülər üçün tətbiq olunan imtahanlar və seçmə mexanizmləri mühüm addım olsa da, təkcə ilkin seçim bütün problemləri həll etmir: “İmtahanlar əsasən qanunvericilik, yol hərəkəti qaydaları və peşə hazırlığını qiymətləndirir. Halbuki xidmət sahəsində çalışan şəxs üçün stresin idarə olunması, müştəri ilə düzgün ünsiyyət, konfliktlərin həlli və etik davranış ən az texniki bilik qədər vacibdir. Eyni zamanda, sürücü imtahandan keçdikdən sonra onun fəaliyyətinə davamlı nəzarət, təkrar qiymətləndirmə və mütəmadi təlim mexanizmləri də effektiv şəkildə işləməlidir. Əks halda, ilkin seçimin təsiri zaman keçdikcə zəifləyə bilər. Bu cür halların qarşısını almaq üçün həm sürücülərin, həm də sərnişinlərin məsuliyyəti artırılmalıdır. Sürücülər üçün etik davranış və müştəri xidməti üzrə müntəzəm təlimlər təşkil edilməli, ciddi pozuntular törədən şəxslər barədə operativ tədbirlər görülməlidir. Eyni zamanda, sərnişinlər də bilməlidirlər ki, sürücüdən qanunsuz tələblər irəli sürmək, onu təhqir etmək və ya aqressiv davranmaq yolverilməzdir. Taksi platformalarında şikayət və qiymətləndirmə mexanizmləri daha şəffaf işləməli, avtomobillərdə səs və görüntü qeydi aparan təhlükəsizlik sistemlərinin tətbiqi genişləndirilməli, mübahisəli halların obyektiv araşdırılması təmin edilməlidir. Hesab edirəm ki, yalnız qarşılıqlı hörmət, peşəkarlıq, davamlı nəzarət və effektiv hüquqi mexanizmlərin birlikdə tətbiqi taksi xidmətində həm təhlükəsizliyi, həm də xidmət keyfiyyətini yüksəldə bilər".
Zeynəb Həsən
12:30 08.08.2026
Oxunuş sayı: 69
