Tokayev Azərbaycanın Mərkəzi Asiya formatına qoşulmasını yeni əməkdaşlıq mərhələsi kimi dəyərləndirib
Azərbaycanın Məşvərət görüşlərinin tamhüquqlu iştirakçısı kimi qoşulması qarşılıqlı fəaliyyətimizin yeni mərhələsinin başlanğıcı oldu.
Crossmedia.az-ın məlumatına görə, bunu Qazaxıstan Prezidenti Kasım-Jomart Tokayev Azərbaycan və Mərkəzi Asiya dövlət başçılarının qeyri-rəsmi görüşündə bildirib.
"Bizim qeyri-rəsmi görüşümüz gündəlikdə duran aktual məsələləri müzakirə etmək və çoxtərəfli tərəfdaşlığın gələcək prioritetlərini müəyyənləşdirmək üçün yaxşı bir imkandır. Bütün səviyyələrdə əlaqələrin intensivliyi dövlətlərimizin qardaş xalqların rifahı və bütün regionun tərəqqisi naminə qurucu əməkdaşlığa sadiqliyini bariz şəkildə şəkildə təsdiqləyir", - Tokayev bildirib.
Prezident qeyd edib ki, qarşılıqlı etimadın möhkəmlənməsi və regional əməkdaşlığın ardıcıl inkişafı sayəsində Mərkəzi Asiya özünün müasir tarixinin ən uğurlu dövrünü yaşayır.
"Azərbaycanın Məşvərət görüşlərinin tamhüquqlu iştirakçısı kimi qoşulması qarşılıqlı fəaliyyətimizin yeni mərhələsinin başlanğıcı oldu. Birgə səylərlə siyasi dialoqun daha da dərinləşməsi, investisiya, energetika, sənaye sahələrində əməkdaşlığın genişləndirilməsi və vahid nəqliyyat-logistika sisteminin formalaşdırılması üçün şərait yaradılır", - Tokayev qeyd edib.
12:38 31.07.2026
Oxunuş sayı: 42
