Özel Türkiyə siyasətini qarışdırır: Onun əsl məqsədi açıqlandı
Türkiyə müxalifətində siyasi balansı dəyişə biləcək yeni proses başlayıb. Ana müxalifət olan Cümhuriyyət Xalq Partiyasının (CHP) keçmiş sədri Özgür Özel və onu dəstəkləyən 90 millət vəkilinin istefası, yeni siyasi partiyanın yaradılması ilə ölkədə müxalifət düşərgəsində yeni qüvvə nisbətinin formalaşa biləcəyi ehtimallarını artırıb.
Jurnalist Vüsal Məmmədov Crossmedia.az-a açıqlamasında bildirib ki, CHP sədri Özgür Özəlin 90 deputatla birlikdə partiyadan ayrılaraq yeni siyasi təşkilat yaratması baş verərsə, bu, Türkiyənin daxili siyasi balansına ciddi təsir göstərə bilər:
"Özgür Özəlin 90 millət vəkili ilə birlikdə CHP-dən istefa verərək yeni partiya yaratması Türkiyənin daxili siyasətində qüvvələr nisbətini köklü şəkildə dəyişə bilər. Son illərdə hakim Ədalət və İnkişaf Partiyasının (AKP) dominant mövqedə olduğu və siyasi oyun qaydalarını böyük ölçüdə müəyyən etdiyi partiya sistemi formalaşıb. Özəlin əsas məqsədi bu sistemi sarsıtmaq, AKP-nin müxalifəti istədiyi kimi formalaşdırmaq imkanlarını məhdudlaşdırmaqdır".
Ekspertin sözlərinə görə, AKP-nin üstünlüyü cəmiyyətin müxtəlif təbəqələrinə xitab edə bilməsindədir:
"AKP-nin əsas üstünlüyü əhalinin daha geniş spektrinə müraciət etməsi və dini faktorun siyasi baxımdan səmərəli istifadəsidir. Daha çox sekulyar elektorata söykənən CHP isə nisbətən məhdud sosial bazaya malikdir. Özgür Özəlin mümkün addımı da məhz bu çərçivəni genişləndirməyə hesablanıb".
V.Məmmədov hesab edir ki, yeni siyasi model müxtəlif ideoloji qrupları bir araya gətirməyi hədəfləyir:
"Yeni partiyanın nizamnaməsində CHP-nin əsas prinsipləri qorunmaqla yanaşı, daha geniş siyasi spektri əhatə edən yanaşmaların yer alacağı gözlənilir. 'Türkiyə İttifaqı' modeli çərçivəsində mühafizəkarlar, liberal-demokratlar, kürdlər və milliyyətçi demokratlar kimi müxtəlif seçici qruplarına müraciət etmək planlaşdırılır. Klassik CHP modeli bu auditoriyanı tam şəkildə əhatə edə bilmirdi".
Onun fikrincə, əvvəlki müxalifət təcrübəsi yeni yanaşmanın zəruriliyini ortaya qoyub:
"Son seçkilərdə "Altılı masa" formatının uğursuzluğu göstərdi ki, yalnız liderlər səviyyəsində qurulan ittifaqlar istənilən nəticəni vermir. Yeni yanaşma isə siyasi birləşməni aşağıdan, yəni cəmiyyətin müxtəlif təbəqələrinin dəstəyi ilə formalaşdırmağa hesablanıb. Bu model həm də partiya bürokratiyasını zəiflədərək seçicilərin siyasi proseslərdə daha fəal iştirakını təşviq edə bilər. Əkrəm İmamoğlunun kənardan verəcəyi mümkün dəstək də bu baxımdan mühüm rol oynaya bilər".
V.Məmmədov bildirib ki, belə bir ssenaridə CHP zəifləyə, əsas siyasi rəqabət isə AKP üçün daha mürəkkəb xarakter ala bilər:
"Belə bir şəraitdə CHP-nin zəifləməsi qaçılmaz görünür. Xüsusilə Kamal Kılıçdaroğlunun partiya rəhbərliyində qalacağı təqdirdə bu proses daha da sürətlənə bilər. Bununla yanaşı, əsas siyasi çağırış gələcək seçkilərdə AKP üçün yaranacaq. Ərdoğan hakimiyyətinə qarşı olan xarici siyasi dairələrin, xüsusilə Avropa institutlarının yeni siyasi təşəbbüsə dəstək verməsi ehtimalı da istisna deyil. Bu amillər seçicilərin uzunmüddətli hakimiyyətdən yorulması fonunda Türkiyənin siyasi mənzərəsinə ciddi təsir göstərə bilər".
Nigar Xəlilli
19:00 25.07.2026
Oxunuş sayı: 62
