MATE Universitetinin professoru ADAU-da təlim keçib
Macarıstan Kənd Təsərrüfatı və Həyat Elmləri Universitetinin (MATE) professoru, aqrar iqtisadiyyat və əməliyyat tədqiqatları sahəsində tanınmış mütəxəssisi, professor Zoltan Karoly Lakneri Azərbaycan Dövlət Aqrar Universitetinin (ADAU) professor-müəllim heyəti və tələbələri üçün təlimlər keçib.
İki gün davam edən elmi-təcrübi təlimlər Torpaqşünaslıq və aqrokimya fakültəsində təşkil olunub.
Crossmedia.az xəbər verir ki, professor iqtisadi modelləşdirmə, sistem dinamikası, süni intellektin qərar qəbuluna tətbiqi və aqrar sektorun iqtisadi araşdırmaları kimi sahələrdə təcrübəsini bölüşüb. Təlimlər zamanı iştirakçılara R proqramlaşdırma və müasir tədqiqat metodologiyaları üzrə praktiki biliklər təqdim edilib. Bu yanaşmalar aqrar sahədə dayanıqlı inkişaf məqsədlərinə nail olunmasında müasir elmin tətbiqini əks etdirir və tələbə, tədqiqatçıların bilik və bacarıqlarını qlobal səviyyədə artırmağa töhfə verir.
Həmçinin professor Zoltan Karoly Lakner ADAU-nun rektoru Zəfər Qurbanovla da görüşüb. Görüşdə hər iki universitet arasında elmi və tədris əməkdaşlığının genişləndirilməsi imkanları müzakirə olunaraq, əməkdaşlıq perspektivləri çərçivəsində aqrar elmlər sahəsində innovativ layihələr və dayanıqlı inkişaf məqsədlərinə yönələn tədqiqatların zəruriliyi vurğulanıb.
14:00 25.12.2024
Oxunuş sayı: 11713
