Bakıda Azərbaycan Din Xadimlərinin Forumu keçirilir

Dekabrın 23-də Bakıda “Dini maarifləndirmənin aktual məsələləri: ənənə, təcrübə və perspektivlər” mövzusunda Azərbaycan Din Xadimlərinin Forumu keçirilir.

Crossmedia.az xəbər verir ki, forumda müvafiq dövlət qurumlarının, Azərbaycan Respublikasında fəaliyyət göstərən müxtəlif konfessiyaların nümayəndələri, eləcə də dini təhsil müəssisələrinin müəllimləri, ilahiyyatçı alim və mütəxəssislər iştirak edirlər.

Azərbaycan Din Xadimlərinin Forumu çərçivəsində “Qərbi Azərbaycan: xəritələr, eksponatlar, abidələr, deportasiya” mövzusuna həsr olunan fotosərgi nümayiş etdirilir.

Azərbaycan Respublikasının Dövlət Himninin səsləndirilməsi ilə başlayan Forumda Azərbaycan xalqının Ümummilli Lideri Heydər Əliyevin və ölkəmizin müstəqilliyi, ərazi bütövlüyü, suverenliyi uğrunda canlarını qurban verən şəhidlərin xatirəsi bir dəqiqəlik sükutla yad edilib.

Tədbirdə əvvəlcə Azərbaycan Respublikasının Prezidenti İlham Əliyevin “Dini maarifləndirmənin aktual məsələləri: ənənə, təcrübə və perspektivlər” mövzusunda Azərbaycan Din Xadimlərinin Forumunun iştirakçılarına müraciəti oxunub.

Müraciəti Prezident Administrasiyasının Humanitar siyasət, diaspor, multikulturalizm və dini məsələlər şöbəsinin müdiri Fərəh Əliyeva səsləndirib.

Daha sonra Azərbaycan Respublikası ərazisindəki dini ibadət yerləri, ziyarətgahlar, ixtisaslaşdırılmış satış məntəqələri, ölkədə fəaliyyət göstərən din xadimləri haqqında informasiya bazasının sistemləşdirilmiş formada toplandığı vahid elektron xidmətlər portalı olan AMİN (Azerbaijan Multicultural Information Network) layihəsinin video təqdimatı keçirilib.

Açılış nitqi ilə çıxış edən Dini Qurumlarla İş üzrə Dövlət Komitəsinin sədri Ramin Məmmədov bildirib ki, Ümummilli Lider Heydər Əliyevin əsasını qoyduğu dövlət- din münasibətləri modeli tarixi ənənələrə və ümumbəşəri dəyərlərə istinad edir. Prezident İlham Əliyev tərəfindən uğurla davam etdirilən bu siyasətin mərkəzində dini, etnik mənsubiyyət deyil, insan amili dayanır. Bu gün bu tədbirdə bütün etnik və dini icmaların nümayəndələrinin iştirak etməsi  Azərbaycanda multikulturalizm, tolerantlıq kimi universal prinsiplərə əsaslanan ictimai münasibətlər sisteminin keyfiyyət göstəricisidir. Komitə sədri qeyd edib ki, dövlətimizi güclü edən əsas amillərdən biri, heç şübhəsiz ki, multikultural ənənələrimizlə, yanaşı milli-mənəvi dəyərlərimizi qorumağımızdır. 4 il öncə Azərbaycan xalqı Ali Baş Komandanın ətrafında birləşərək, torpaqlarını işğaldan azad etdi. Bu, həm də 30 il ərzində dağıdılmış, təhqir olunmuş məscidlərin, etnik, bəzən də dini mənsubiyyəti dəyişdirilməyə cəhd olunan məbədlərimizin azad edilməsi idi. Birinci vitse-prezident Mehriban xanım Əliyevanın təşəbbüsü ilə Heydər Əliyev Fondu tərəfindən Qarabağ və Şərqi Zəngəzurda tarixi və mədəniyyət abidələrinin bərpası işləri uğurla həyata keçirilir. Çıxışı zamanı kənar ideoloji müdaxilələrin cəmiyyətlərdə parçalanma, qütbləşmə, dini-etnik ədavət yaratmaq təhlükələri barədə də danışan Ramin Məmmədov Azərbaycanın, bu mənada ən sabit ölkələrdən biri olduğunu vurğulayıb.  Bildirib ki, bu, arxayınlaşmağa, mümkün və ehtimal olunan ideoloji təhdidləri nəzərdən qaçırmağa əsas vermir. Unutmamalıyıq ki, qloballaşma bəzən təhdidlərin də qloballaşması deməkdir. Güclü dövlət həm də belə ehtimalları vaxtında aşkara çıxarır, proqnozlaşdırır, zəruri önləyici tədbirlər görür. Bu forum dini maarifləndirmə, dünyəvi dəyərlərin, multikulturalizm ənənələrinin təşviqi, dinin siyasiləşdirilməsinə yol verilməməsi ilə bağlı müzakirələrin aparılması baxımından böyük əhəmiyyətə malikdir. Dini maarifləndirmənin aktual məsələləri deyəndə, biz ilk növbədə bu istiqamətləri nəzərdə tuturuq. Bildirilib ki, Azərbaycan Respublikasının Prezidenti Zati-aliləri cənab İlham Əliyevin forum iştirakçılarına ünvanlanmış müraciəti bu tədbirə verilən ən ali qiymətdir. Cənab Prezidentin müraciətində əksini tapmış tövsiyələr gələcəklə bağlı planlarımızın fəlsəfəsini və ideoloji məzmununu müəyyənləşdirir.

Qafqaz Müsəlmanları İdarəsinin sədri Şeyxülislam Allahşükür Paşazadə Müzəffər Ali Baş Komandan İlham Əliyev cənablarının rəhbərliyi ilə 44 günlük Vətən müharibəsində zəfər qazanmış Azərbaycan xalqının dini maarifləndirmə sahəsində din xadimlərinin üzərinə böyük vəzifələr düşdüyünü deyib. Bildirib ki, qalib Azərbaycanın azad Qarabağda apardığı genişmiqyaslı quruculuq işləri, bərpa olunan dini-mənəvi irsimiz, dövlətimizin artan beynəlxalq nüfuzu — bütün bunlar dini-mənəvi maarifləndirmədə əks olunmalı və din xadimlərimiz bu şərəfli gerçəkləri insanlara ən yüksək şəkildə çatdırmağı bacarmalıdırlar. .

Azərbaycan Respublikası Milli Məclisi sədrinin birinci müavini Əli Əhmədov bildirib ki, Azərbaycan bütün dünyaya həm dini tolerantlıq, həm də multikulturalizmin mərkəzi kimi təqdim edilir. Dini maarifləndirmə məsələlərinin əhəmiyyətindən bəhs edən Əli Əhmədov bildirib ki, ölkəmiz bu istiqamətdə transformasiya keçir. Vətəndaşlarımızın həm dini olduğu kimi dərk edərək özünün dinə münasibətini anlamaları və müəyyənləşdirmələri, həm də cəmiyyətə baxışlarının formalaşdırılması mövqeyindən dini təbliğat və maarifləndirmənin düzgün aparılması çox mühüm əhəmiyyət kəsb edir. Dini maarifləndirmənin həyata keçirilməsinin kifayət qədər həssas məsələ olmasından da bəhs edən Milli Məclis sədrinin birinci müavini əsas məsələ kimi bu prosesin hədəf kütləsinin düzgün müəyyənləşdirilməsinin önəmindən bəhs edib.

Azərbaycan Milli Elmlər Akademiyasının prezidenti, akademik İsa Həbibbəyli dünyada islamofobiya hallarının artdığını, bunun bəşəriyyətə zərbələr vurduğunu qeyd edərək, fonda Azərbaycanda ictimai-siyasi və dini sabitliyin mövcud olduğunu diqqətə çatdırıb. Bildirib ki,  əsası Ulu Öndər Heydər Əliyev tərəfindən qoyulan dövlət-din münasibətləri mənəvi kamilləşmənin mühüm prinsipinə çevrilib. Ölkəmiz bu baxımdan dünyaya bir nümunədir.
Müstəqil Azərbaycanın möhtəşəm Azərbaycana çevrilməsində Ulu Öndər Heydər Əliyevin siyasi kursunu layiqincə davam etdirən Prezident İlham Əliyevin siyasətinin əvəzsiz olduğunu bildirən akademik Azərbaycanın dinlərarası dialoq sahəsində böyük təcrübəyə malik olduğunu vurğulayıb. Əlavə edib ki, ölkəmizdə tolerantlıq siyasəti cəmiyyətimizin norma prinsiplərinə çevrilib.
Dini Qurumlarla İş üzrə Dövlət Komitəsinin təşkilatçılığı ilə keçirilən Din Xadimlərinin I Forumunu yüksək qiymətləndirən İsa Həbibəyli gələcəkdə AMEA-nın DQİDK və QMİ ilə birgə dini maarifləndirmənin elmi əsaslarına həsr olunmuş konfransların keçirilməsinin vacib olduğunu diqqətə çatdırıb.

Azərbaycan Respublikasının Elm və təhsil nazirinin müavini Firidun Qurbanov bildirib ki, ölkəmizdə dövlət-din münasibnətlərin dünyəvilik prinsipi ilə tənzimlənir. Ümumtəhsil pilləsi üzrə təhsil proqramlarında “Həyat bilgisi”, “Azərbaycan tarixi”, “Ümumi tarix” fənləri üzrə təhsil proqramlarında təhsilalanların mədəni və dini müxtəlifliyə hörmət hissinin tərbiyəsi, dinlər haqqında aydın təsəvvürlərin formalaşması, multikultural dəyərlərə hörmət aşılanır.  F.Qurbanov onu da əlavə edib ki, həmin fənlərin tədrisində fərqli dinləri birləşdirən ümumbəşəri dəyərlər aşılanır, şagirdlər dini bayramlar haqqında ümumi məlumata yiyələnir, səmavi dinlərin təbliğ etdiyi ümumi ortaq dəyərləri – dürüst olmağı, yalan danışmamağı, pislik etməməyi və s. öyrənirlər.  

Azərbaycan Respublikasının Ailə, Qadın və Uşaq Problemləri üzrə Dövlət Komitəsinin sədri Bahar Muradova ölkəmizdə müxtəlif dini konfessiyalara məxsus xalqlar və etnik qrupların daim sülh şəraitində mövcud olmaları və bu əsasda formalaşmış birgəyaşayış modelinin özünəməxsus unikallığının qorunub saxlamasından danışıb. Vurğulayıb ki, bu öz növbəsində bizim malik olduğumuz və haqlı olaraq hər zaman qürur duyduğumuz multikulturalizm və tolerantlıq dəyərlərinin əsasını təşkil edir. Ölkəmizdə Konstitusiya və qanunvericilik çərçivəsində bütün dinlərə bərabər inkişaf, fərqli mədəniyyətlərə mənsub insanlara isə birgə, yanaşı yaşamaq imkanları təmin edilib. Respublikamızda ənənəvi multikulturalizm və tolerantlıq siyasətininin bu gün də davam etdirildiyini qeyd edən Komitə sədri müxtəlif dinlərə və mədəniyyətlərə mənsub insanların harmoniya şəraitində bir-birini zənginləşdirməsindən danışıb.

Tədbirin “Dünyəvi dövlətdə dini təhdidlər: siyasi-ideoloji baxış”, “Qadın hüquqlarının həyata keçirilməsində din amilinin rolu”, “Azərbaycan multikulturalizmi: təcrübə, ənənə və müasir çağırışlar” və “Dünyəvi dövlətdə dini təhsil modelləri: nəzəriyyə və praktika” mövzularına həsr olunacaq panel sessiyalarında dini sahədəki siyasətin əsas istiqamətləri, aktual məsələləri, ölkədə dini durumla bağlı mövcud vəziyyət müzakirə olunacaq.