OpenAI, anlıq video və vizual analiz bacarıqlarını təqdim etdi
OpenAI, süni intellekt dünyasında böyük maraq doğuran real vaxtda video və vizual analiz bacarıqlarını nəhayət istifadəyə verdi. ChatGPT-nin İnkişaf etmiş Səs Rejimi ilə inteqrasiya olunmuş bu yenilik, istifadəçilərə cihazları vasitəsilə anlıq vizual analiz etmək imkanı yaradır. Beləliklə, ChatGPT artıq yalnız mətn və səslə deyil, həm də görüntülərlə qarşılıqlı əlaqə qura bilir.
OpenAI-nin yeni elan etdiyi bu xüsusiyyət ilk olaraq ChatGPT Plus, Team və Pro abunəçiləri üçün əlçatan olacaq. İstifadəçilər, ChatGPT tətbiqi vasitəsilə telefon kameralarını hər hansı bir obyektə yönəldərək həmin obyekt haqqında dərhal məlumat ala biləcəklər. Bundan əlavə, tətbiq ekran paylaşımı vasitəsilə cihaz ekranında görünən məlumatları da analiz edə bilir.
Məsələn, istifadəçilər mürəkkəb tənzimləmə menyularında olarkən ChatGPT-dən bələdçilik ala bilər və ya riyazi məsələlərin həlli zamanı təkliflər istəyə bilərlər. Bu yenilik, səsli ünsiyyət zamanı vizual dəstək almaq imkanı yaradaraq istifadəçi təcrübəsini əhəmiyyətli dərəcədə yaxşılaşdırır.
ChatGPT-nin vizual analiz funksiyasını başlatmaq üçün tətbiqdaxili söhbət çubuğunun yanındakı səs ikonuna toxunmaq, daha sonra sol alt küncdəki video ikonuna basmaq kifayətdir. Ekran paylaşımı etmək istəyən istifadəçilər isə üç nöqtəli menyuya daxil olaraq “Ekranı Paylaş” seçimini istifadə edə bilərlər.
OpenAI, bu xüsusiyyətin 14 dekabr 2024-cü ildən etibarən mərhələli şəkildə istifadəyə veriləcəyini bildirib. Xüsusiyyət bir həftə ərzində bütün uyğun abunəçilərə təqdim olunacaq. Lakin bütün istifadəçilər eyni anda bu funksiyadan faydalana bilməyəcək.
Xüsusilə ChatGPT Enterprise və Edu abunəçiləri, bu yeniliyə 2025-ci ilin yanvar ayından etibarən çıxış əldə edəcəklər. Avropa İttifaqı ölkələri, İsveçrə, İslandiya, Norveç və Lixtenşteyn kimi bölgələrdə yaşayan istifadəçilər üçün isə hələlik dəqiq bir cədvəl açıqlanmayıb.
OpenAI-nin bu yeni addımı, texnologiya nəhəngləri arasında rəqabəti daha da qızışdırır. Google və Meta kimi böyük şirkətlər də oxşar vizual analiz bacarıqları üzərində işlərini davam etdirirlər. Ötən həftə Google, Android cihazları üçün hazırladığı real vaxtda video analiz imkanlarına malik söhbət botu layihəsi olan “Project Astra”-nı məhdud sayda istifadəçi üçün təqdim etdi. Bu inkişaf, süni intellekt dəstəkli vizual analiz texnologiyalarının getdikcə daha geniş yayılqcağını göstərir.
Emil Nağızadə
08:23 16.12.2024
Oxunuş sayı: 5923
