Rusiya müharibədən 4 il sonra: iqtisadi tənəzzül, hərbi məğlubiyyət və qlobal izolyasiya
Die Zeit qəzetinin təhlilinə görə, Vladimir Putin Ukrayna ilə bağlı strateji hədəflərinə tam nail ola bilməyib.
Qəzet bildirir ki, Moskvanın həm hərbi, həm siyasi, həm də iqtisadi planları gözlənilən nəticəni verməyib və proseslər Kremlin ilkin hesablamalarından fərqli istiqamətdə inkişaf edib.
Məlumata əsasən, Rusiyanın müharibə vasitəsilə iqtisadiyyatı canlandırmaq cəhdi uğursuz olub, ölkə iqtisadiyyatı artım əvəzinə tənəzzül riski ilə üz-üzə qalıb.
Eyni zamanda, Ukraynanın müstəqilliyini zəiflətmək niyyəti əks effekt verərək milli həmrəyliyin və milli kimlik şüurunun daha da güclənməsinə səbəb olub.
Qəzet qeyd edir ki, Kiyevi qısa müddətdə nəzarətə götürmək planı baş tutmayıb, hərbi əməliyyatlar əsasən Donbas bölgəsində cəmlənib. Bundan əlavə, Rusiyanın NATO-nun genişlənməsinin qarşısını almaq məqsədi də reallaşmayıb – Finlandiya və İsveç alyansa qoşulub, Almaniya isə Rusiya qazından asılılığını əhəmiyyətli dərəcədə azaldıb.
Mövzu ilə bağlı Crossmedia.az-a politoloq Elçin Xalidbəyli bildirib ki, Rusiya artıq qlobal məkanda super güc statusunu faktiki olaraq itirib. Qərb siyasi dairələri bunu açıq şəkildə bəyan edir və vurğulayırlar. Ukrayna savaşına başlaması ilə Rusiya bu mövqeyini itirməyə başlamışdı.
Elçin Xalidbəyli qeyd edib ki, Moskva üç gün ərzində Kiyevdə hərbi qələbə paradı keçirəcəyini iddia edirdi, amma artıq dörd ildir ki, münaqişə davam edir və bu müddətdə Ukraynanın təxminən 20 faizi işğal olunub.
“Bütün dünyada Rusiya biabır olub, işğalçı ölkə kimi tanınır. Amma Kremlin daxili təəssüratı hələ də böyük imperiya mövqeyinə əsaslanır,” – deyə politoloq əlavə edib.
Ekspert bildirib ki, Rusiyanın iqtisadiyyatına qarşı tətbiq olunan sanksiyalar ciddi təsir göstərir.
“Rusiya əsas ixrac məhsulu olan enerji resurslarını Avropa bazarından kənarda saxlayır. 2027-ci ilə qədər Avropa Birliyinə üzv dövlətlər Rusiyadan enerji idxalını tamamilə dayandıracaq. Bu isə Moskvanı Asiya bazarına yönəltməyə məcbur edir. Nəticədə Rusiya Çin və Hindistan kimi ölkələrə daha ucuz qiymətə satmalı olacaq və faktiki olaraq Çin üçün asılı dövlətə çevriləcək,” – deyə Xalidbəyli bildirib.
Politoloq həmçinin vurğulayıb ki, Rusiyanın hərbi qüdrəti barədə miflər dağılıb.
“Yalnız nüvə silahı istisna olmaqla, Qərb ölkələri Rusiyanın hərbi potensialını ciddi təhlükə kimi görmür. Nüvə silahı ilə bağlı ehtiyatlar var, amma digər resurslar tükənməkdədir,” – deyə o qeyd edib.
Elçin Xalidbəyli yekun olaraq bildirib ki, iqtisadi çöküş, hərbi resursların azalması və beynəlxalq təcrid Moskvanı gələcəkdə mövcudluq şərtlərini dəyişməyə məcbur edə bilər:
“Yaxın 10 ildə indiki Rusiyanın tarixi perspektivdə mövcudluğunu itirməsi də istisna deyil".
Mehriban Yariyeva
13:31 27.02.2026
Oxunuş sayı: 728
