Azərbaycan humanitar diplomatiyaya dəstək verir: Suriyada məktəblər tikilir
Azərbaycan humanitar sahədə yeni bir addım atılıb. Belə ki, Suriya ərazisində dağıdılmış və zədələnmiş 10-a yaxın məktəbin tikintisi və təmiri Azərbaycan tərəfindən həyata keçiriləcək. Azərbaycan bu təşəbbüslə müharibədən zərər çəkmiş bölgələrdə təhsilin bərpasına dəstək verməklə yanaşı, humanitar missiyasını və beynəlxalq həmrəyliyini bir daha nümayiş etdirir.
Azərbaycanın bu humanitar təşəbbüsü barədə Milli Məclisin deputatı Elşad Musayev Crossmedia.az-a açıqlama verib: "Azərbaycan Suriya Ərəb Respublikasında da dağıdılmış və zədələnmiş məktəblərin tikintisinə və təmirinə dəstək verəcək. Bu prosesin həyata keçirilməsi ilə bağlı 3 nəfər imza atıb: Azərbaycan tərəfindən elm və təhsil naziri Emin Əmrullayev, Suriya Ərəb Respublikasının təhsil naziri Dr. Mohammed Abdulrahman Turko və ICESCO-nun baş direktoru Dr. Salim bin Məhəmməd əl-Malik. Burada əsas nəzərdə tutulan məqam ondan ibarətdir ki, bildiyimiz kimi, Suriyada uzun müddət müharibə baş verib. Nəticədə məktəblər dağıdılıb, məhv edilib, həmçinin kommunikasiya xətləri sıradan çıxıb, insanlar kütləvi qırğına məruz qalıblar. Beynəlxalq aləm Suriyaya dəstək vermək qərarına gəlib. Qardaş Türkiyə başda olmaqla, ayrı-ayrı ölkələr bu məsələyə çox ciddi yanaşıblar. Azərbaycan da bu prosesdən kənarda qalmayıb. Bu, bir tərəfdən uşaqların təhsilinin davam etdirilməsi üçün vacib bir addımdır. Azərbaycan bununla da humanitar diplomatiyasını gücləndirir”.
E. Musayev eyni zamanda Azərbaycanın regional və müsəlman dünyası ilə əlaqələrini gücləndirdiyini, Türk-İslam dünyası ilə həmrəylik nümayiş etdirdiyini də qeyd edib: “Beləliklə, Azərbaycan Suriyada məktəblərin tikilməsini və zədələnmiş məktəblərin təmirini həyata keçirməyi öz üzərinə götürüb”.
Fatimə Məmmədova
11:31 19.02.2026
Oxunuş sayı: 506
