Azərbaycan, Türkiyə, Gürcüstan Bakı-Tbilisi-Qars dəmir yolunun tam gücü ilə fəaliyyətinə hazırlaşır
Ankarada Türkiyə Böyük Millət Məclisinin Xarici əlaqələr komitəsinin sədri Fuat Oktay Azərbaycan, Türkiyə və Gürcüstan parlamentlərinin xarici əlaqələr komitələri sədrlərinin birgə görüşündə Bakı-Tbilisi-Qars (BTQ) dəmir yolunun tam həcmdə fəaliyyət göstərməsinin vacibliyini vurğulayıb. O, bu layihənin tam istifadəyə verilməsi üçün işlərin sürətləndirilməli olduğunu qeyd edib. Görüş zamanı regional əməkdaşlığın genişləndirilməsi və təhlükəsizlik sahəsində yeni imkanlar müzakirə olunub.
İqtisadçı Akif Nəsirli Crossmedia.az-a açıqlamasında BTQ dəmir yolunun tam həcmdə fəaliyyətə başlamasının regionun iqtisadiyyatına ciddi təsir göstərəcəyini vurğulayıb. Onun fikrincə, layihə yalnız Azərbaycan, Türkiyə və Qazaxıstan üçün deyil, eyni zamanda Orta Asiya ölkələri üçün də böyük fayda gətirəcək:"Layihənin tam gücü ilə işə düşməsi regionda yükdaşıma müddətlərini azaltmaqla yanaşı, ticarət dövriyyəsini artıracaq. Orta Asiyadan Avropaya daşınan yüklər bu dəhliz vasitəsilə daha effektiv şəkildə çatdırıla bilər."
Nəsirli əlavə edib ki, hazırda Türkmənistanda Orta Dəhliz layihəsi çərçivəsində geniş yenidənqurma işləri aparılır. Bu, Avropa ilə Asiya arasında daha güclü nəqliyyat əlaqəsi qurmaq məqsədini güdür. Türkmənistan ərazisində 1000 kilometrdən çox dəmir yolunun yenilənməsi isə BTQ dəhlizinin daha strateji əhəmiyyət qazanmasına səbəb olacaq.
Ekspertin fikrincə, Zəngəzur dəhlizi istifadəyə verilərsə, Bakı-Tbilisi-Qars dəmir yolunun yükdaşıma marşrutu kimi əhəmiyyəti müəyyən qədər azala bilər:"Zəngəzur dəhlizi daha qısa və sərfəli marşrut təklif edir. Lakin Ermənistan və Rusiya bu dəhlizin işə düşməsini müxtəlif səbəblərdən əngəlləməyə çalışır."
Buna baxmayaraq, Nəsirli hesab edir ki, mövcud şəraitdə Bakı-Tbilisi-Qars dəmir yolu hələ uzun müddət regionda əsas tranzit xətlərindən biri olaraq qalacaq.
Layihənin turizm sahəsinə də təsir göstərə biləcəyini vurğulayan Akif Nəsirli bildirib ki, bu baxımdan ən çox faydalanan ölkələr Gürcüstan və Türkiyə olacaq:"Azərbaycanın turizm infrastrukturu bu layihədən tam yararlanmaq üçün hələ kifayət qədər inkişaf etməyib. Lakin Naxçıvana dəmir yolu xəttinin işə düşməsi ilə bu sahədə irəliləyişlər mümkündür."
Nəsirli yekunda qeyd edir ki, BTQ dəmir yolu layihəsi yalnız regional iqtisadiyyatın deyil, həm də Avropa-Asiya əlaqələrinin inkişafı üçün vacib bir körpüdür.
Nihat Tahirov
11:51 04.12.2024
Oxunuş sayı: 7452
