20 Yanvar zamanı siyasi hakimiyyət Moskvanın quluydu, lakin... - Anar İsgəndərov danışdı
Azərbaycan tarixi həm böyük qələbələrlə, həm də faciələrlə doludur. Hər bir sınaq xalqımızın iradəsini sınayıb, amma onu eyni zamanda daha güclü edib. 20 Yanvar isə xalqımızın müstəqillik və azadlıq uğrunda mübarizəsinin simvoluna çevrilib. O günlərdə xalq göstərdi ki, heç bir zorakılıq və təzyiq onun mənəvi dirçəlişini dayandıra bilməz.
20 Yanvar faciəsinin üzərindən 36 il keçməsinə baxmayaraq, həmin hadisəni hər dəfə eyni hisslər, emosiyalarla xatırlayırıq.
Milli Məclisin deputatı, tarixçi- alim Anar İsgəndərov 20 Yanvar faciəsinin Azərbaycan tarixi yaddaşındakı yeri ilə bağlı Crossmedia.az-ın suallarını cavablandırıb:
— 20 Yanvar faciəsinin Azərbaycan tarixindəki rolu nədən ibarətdir?
— 20 Yanvar Azərbaycan xalqının taleyində və tarixində nə birinci, nə də sonuncu faciədir. Bu hadisə göstərdi ki, Moskva heç vaxt Azərbaycanın paytaxtı olmayıb və şimaldan heç vaxt isti, mülayim külək gəlməyib – yalnız dərd, işğal və qan tökmək gəlib. Sovet ordusu Azərbaycan xalqına güllə atdı, mülki əhali tank tırtıllarının altında qaldı. 20 Yanvar həm keçmişdə, həm də gələcəkdə xalqa dərs verdi: xalqın müstəqilliyi, dili, dini və bayrağı əlindən alınanda belə, mənəviyyatdan və azadlıqdan vaz keçilməməlidir.
— Xalqın birliyi və mübarizəsi nəyi göstərdi?
— Hadisə göstərdi ki, xalq yalnız vahid ideya və məqsəd ətrafında birləşəndə qalib gəlir. 20 Yanvar zamanı siyasi hakimiyyət Moskvanın quluydu, lakin xalq müstəqillik uğrunda mübarizəni davam etdirdi. Xalq və milli ziyalılar bu faciədən dərs götürdü, Azərbaycanın müstəqilliyini qorumağın vacibliyini dərk etdi.
— Baş verən hadisələr nəyə yol açmış oldu?
— 20 Yanvar xalqın müstəqillik arzularını gücləndirdi. 1991-ci ildə Azərbaycan dövlət müstəqilliyini bərpa etdi, 1 milyon qaçqın və köçkün olsa da, xalq anladı ki, bundan sonra yalnız öz gücü ilə hərəkət etməlidir. Bu hadisələr göstərdi ki, heç bir xarici mərkəz və qonşu dövlətə ümid bağlamaq doğru deyil.
— 20 Yanvarın nəticələri İkinci Qarabağ müharibəsindəki qələbəmizə necə təsir etdi?
— Xalq 2020-ci ilin 44 günlük Vətən müharibəsində bir daha göstərdi ki, rəhbər ətrafında birləşəndə qalib gəlir. Azərbaycan ərazilərini bərpa etdi, separatçı erməni qüvvələrinə son qoydu. Bu uğur 1990-cı ildən başlayan müstəqillik mübarizəsinin nəticəsi idi və xalqın öz gücünə inanmasının təntənəsidir.
Elmir Heydərli
11:39 20.01.2026
Oxunuş sayı: 2539
